JPBB Bintulu bebendar ngatur inisiatif nagang pengelekai COVID-19
Sekeda inisiatif ti dipejalaika tu iya nya dalam juluk deka ngurangka penyampau kes ti ngirauka ati kenyau ari dua bulan ti udah
“Bisi 22 SJR lalu Operasyen Matau Tikas Ngasika SOP agi dipejalaika di Bagi Menua ” Bintulu.
Jack Aman Luat
Chairman JPBB Bintulu
BINTULU: Komiti Mutarka Penusah Ngenyit Bagi Menua (JPBB) Bintulu udah bejalaika sekeda chara ti terit kena nagang pengelekai igi penyakit COVID-19 di Bintulu ke lalu bebendar nurunka kes ti majak nyadi sereta ngirauka ati kenyau ari dua bulan ti udah.
Chairman JPBB Bintulu ti mega Residen Bagi Menua Bintulu Jack Aman Luat madah, chara ti proaktif ti diatur sida tu iya nya bejalaika pentin Atur Nagang Pemindah Bisi Penetap (PKPB) Prosedur Operasyen Standard (SOP) Diteritka Agi, pengawa nyidi kes aktif (ACD) COVID19, atur nagang pemindah, operasyen ngempang jalai alun (SJR) enggau operasyen ngasika SOP.
Nyentukka diatu ku iya, bisi 185 ACD sereta 35 Atur
Nagang Pemindah Diteritka Agi (PKPD) dipejalaika enggau 150 ari nya udah abis timpuh pentin.
“Bisi 22 SJR lalu Operasyen Matau Tikas Ngasika SOP agi dipejalaika di Bagi Menua Bintulu,” ku iya lebuh ti meri Licha Khas Gaya Pandemik COVID-19 di Bintulu ba sebuah hotel ditu kena Hari Tiga tu tadi.
Licha tu udah disereta Kepala menteri Datuk Patinggi Abang Johari Tun Openg, Menteri Utiliti ti mega pengatur JPBB Bintulu Dato Sri Dr Stephen Rundi Utom, Duta Khas Menteri Besai ke Republik Rakyat China ti mega Kaban Parlimen Bintulu Datuk Seri Tiong King Sing, Menteri Kandang Menua enggau Pengawa Berumah Dato Sri Dr Sim Kui Hian, Menteri
di Opis Kepala Menteri (Integriti enggau Ombudsman) Datuk Talib Zulpilip sereta Sekretari Perintah Nengeri Sarawak Amar Jaul Samion.
Dalam pekara bukai, ku iya, bisi 148,635 iku tauka 76 peratus individu di Bintulu udah ngerejista ngulihka tuchuk vaksin COVID-19 nyentuk 17 Mei 2021.
Ku iya, ari penyampau nya 105,897 iku udah ngerejista ngena aplikasyen MySejahtera, lalu 42,738 iku udah berejista ngena chara manual.
“Tiga Palan Meri Vaksin (PPV) udah dibuka di Bagi
Menua Bintulu iya nya Dewan Suarah Tatau di pelilih menua Tatau enggau kapasiti 400 iku sehari, Dewan Sri Kenyalang Universiti Putra Malaysia Kampus Bintulu (UPMKB) ungkup pelilih menua Bintulu ti ngaul 1,200 iku sehari sereta Balai Raya Sebauh di pelilih menua Sebauh ungkup 400 iku sehari,” ku iya.
Ku iya nambah, semina Auditorium Kaunsil Pemansang Bintulu (BDA) di Wisma Bintulu nya ti ungkup kapasiti 400 iku sehari aja bedau dibuka nyadika PPV.
“JPBB Bintulu mega nyendiaka Pelin Program Vaksinasi di kandang menua pesisir Bintulu nengah Servis Lutur Terebai (FDS), ‘Rural Clinic Visiting Doctor’ (RCVD) sereta ngena bot enggau perambu peranak ti diberi vaksin di kandang menua pesisir iya nya 13,410 iku,” ku iya.
Kelimpah ari nya, bisi 48 stesyen kuarantin enggau pemisi bilik (hotel) iya nya 2,052 ungkup orang ti dikemata (PUS) sereta kontak semak, ke alai bilik ti disediaka nya nyentukka diatu ti udah endur diau urung 86 peratus.
“Pia mega enam dewan sereta empat hotel enggau 1,520 katil udah nyadi Palan Kuarantin sereta Berubat COVID-19 Berisiko Mit (PKRC),” ku iya nambah.
Bejaku silik bekaul enggau Makmal Peresa COVID-19 ku iya, Sepital Bintulu udah meresa dalam 600 nyentuk 800 sehari lalu Opis Pengerai Bagi Menua mega udah ngatur pengawa meresa ngagai 800 nyentukka 1,000 sehari.