Peranak Suai, Niah deka meri sukung penuh ngagai Dr Rundi ba PRN ke deka datai
BINTULU: Peranak di Suai enggau Niah madahka diri meri sukung penuh ngagai Kaban Kunsil Nengeri Kemena, Dato Sri Dr Stephen Rundi ngambika dichalunka baru nyadi chalun ADUN Kemena ba Pengawa Bepilih Nengeri ke deka datai.
Penyanding Penemu Serakup Tuai Rumah Kandang Menua Suai-Niah Boniface Bada@Bada Enjah nengah penerang berita iya ensana madah, iya deka majak nyukung Dr Rundi laban mandangka prestasi ke manah kenyau ari lima penggal nyadi ADUN Kemena.
“Iya nadai kala ngasaka ati peranak di Suai-Niah lalu udah mayuh meri projek pemansang ngagai peranak di menua nya nyengkaum bantu Projek Mit Pemansang Menua Pesisir (MRP) enggau Projek Transformasyen Menua Pesisir (RTP),” ku iya.
Boniface ke mega nyadi Koordinator Opis Gabungan Parti Sarawak (GPS) Batu Niah madah, semua 71 rumah panjai enggau genturung pendiau di Suai-Niah udah nerima bantu MRP enggau RTP ninting tahun.
Dr Rundi ke mega Menteri Utiliti Sarawak ku iya, nadai kala enda meri agih belanja ngagai Serakup Tuai Rumah kena ngatur program enggau aktiviti baka pengerami ngintu Gawai Dayak, nemuai seraya belajar tuai rumah, program motivasyen enggau penyedar sereta ke bukai.
“Semina program ke baka nya enda ulih diatur kenyau ari taun 2020 ketegal pengelekai penyakit COVID-19,” ku iya.
Chairman Serakup Tuai Rumah Kandang menua Niah Changgai Dali madah, iya nyukung penuh Dr Rundi nyadi chalun laban iya gerah amat jari meri bantu enggau projek pemansang ngagai rayat ba kandang menua SuaiNiah
enggau semua kandang menua di DUN Kemena.
Kelimpah meri projek RTP enggau bantu MRP, Dr Rundi udah enggau naka ulih ngenyukupka perengkaguna enggau infrastruktur di Niah, ke alai nyauka semua udah bulih projek bekal ai enggau elekterik menua pesisir.
“Taun siti nyin tadi, iya udah ngemendarka projek ‘feeder road’ ungkup Jalai Ulu Niah, lali penemu projek nya ila tau nyungkak sosioekonomi peranak ba kandang Ulu Niah enggau kandang menua bukai ke besemak enggau nya,” ku iya.
Changgai mega muji ulah Dr Rundi ti nyaup mutarka penanggul sereta isu tanah peranak Ulu Niah enggau kompeni peribit ti beroperasyen ba kandang menua suba.
Ku Changgai, taun nyin tadi Dr Rundi udah meri agih belanja RM50,000 ngagai Komiti Pemansang enggau Pengelikun Genturung Pendiau (JKKK) Rumah Changgai lalu RM50,000 agi ungkup Biro Wanita rumah panjai nya.
Chairman Serakup Tuai Rumah Kandang Menua Suai, Bakom Ligong madah, iya udah nganjung surat ngagai Kepala Menteri Datuk Patinggi Abang Johari Tun Openg ti nyadi ke tanda sukung ngagai Dr Rundi nyadi chalun DUN Kemena.
Iya muji Dr Rundi nyadi ketuai ti talukka rayat laban suah ngabas rumah panjai enggau genturung pendiau ba kandang menua Suai.
Sekretari Serakup Pemansang Tipun Penan Sarawak Malaysia (PETIPUN) Kunsilor Mareia Hasan mega madahka iya nyukung Dr Rundi dichalunka baru, laban Dr Rundi peranak asal Kemena.
“Iya siku ketuai ti talukka rayat sereta amat komited bejalaika tanggungpengawa ngagai rayat ke ari baruh pegai iya,” ku iya.
Ku iya baru, Dr Rundi ukai semina suah meri sukung ngagai tetiap program ke diatur PETIPUN, tang mega meri sukung penuh enggau tulung ngagai nembiak Penan ke deka nampung pelajar ngagai institusyen pelajar tinggi perintah engagu peribit di nengeri tu.
Berebak enggau nya ku iya, Dr Rundi endang pengari rayat ngamatka semua semaya enggau rayat kelebih agi ba pemansang perengkaguna enggau infrastruktur.
Nya alai ku iya, semua program pemansang ke digaga endang meri empas ke chukup besai ngagai rakyat ba DUN Kemena kelebih agi di Suai-Niah.