PKKDS agi nyukung Rundi nyadi chalun ba DUN Kemena
BINTULU: Serakup Tua Bansa Pelilih Sebauh (PKKDS) sepenemu meri sukung penuh ngagai Dato Sri Dr Stephen Rundi Utom ngambika agi nyadi chalun ba sitak Kunsil Nengeri (DUN) N69 Kemena, ba pengawa bepilih ke deka datai lalu agi nyadi Menteri ba Opis Menteri Utiliti, ke engkeman amat kena mantupka aspirasyen rayat menua pesisir.
Chairman PKKDS Tuai Rumah Justin Agas Guang madah, komitmen Dr Rundi mutarka penanggul rayat enggau ngemansangka DUN Kemena, nyadi batang kebuah sida meri sukung ngagai iya ngambika Kemena majak dikemansangka belama.
Berebak enggau nya ku iya,
DrRundimegaamatngemeratka pengelantang pendiau rayat ba sitak nya kenyau ari iya nyadi pengari rayat di Kemena.
“Sekumbang empat penggal nyadi ADUN Kemena, mayuh macham projek pemansang udah digaga nengah geran projek mit pemansang menua (MRP), Program Transformasyen Menua Pesisir (RTP) enggau Program Nambahmanah Rumah Rayat Miskin Sarawak (PPRMS) ke diberi, kena nentuka rayat ba sitak Kemena enda tinggal ari arus pemansang,” ku iya nengah penerang berita kemari.
Ku iya, tebal agi rumah panjai di menua pesisir sitak Kemena diatu udah bisi mayuh bengkah perengkaguna ai beresi menua pesisir, bekal elekterik menua pesisir nyengkaum Projek Skim Mekal Elekterik Alternatif Menua Pesisir Sarawak (SARES) enggau infrastruktur baka jalai alun enggau ke bukai.
“Laban iya peranak asal menua tu, iya tentu meretika gaya pengidup enggau penanggul rayat ditu (Kemena),” ku iya.
Nya alai ku iya, kami (PKKDS) enda nyukung chalun bukai kelimpaha ari iya, laban kami meda sapa ti bekereja ke rayat, lalu ukai semina nemu bejaku aja.
“Kami ngarapka semua rayat di DUN Kemena anang saru runding enggau sesapa ti ngemeratka diri aja, laban Dr Rundi agi nyadi chalun di DUN N69 Kemena,” ku iya.