GPS ngenataika tiga pekara maya baum enggau Agong
Pekara nya, nyapai ‘imuniti kelompok’, perintah ke kering sereta tegap enggau pelin mulaika pemanah ekonomi
Kami ke nyadi ketuai PRS, SUPP sereta PDP setuju enggau tiga nya kena menaska COVID-19 nyengkaum chara nyaga ekonomi ti udah dipunka Abang Johari ngagai Yang di-Pertuan Agong maya sesi baum enggau iya sehari tu (kemari).
Ketuai PRS, SUPP enggau PDP
KUCHING: Gabungan Parti Sarawak (GPS) ngenataika tiga pekara ke beguna amat maya sesi baum enggau Yang di-Pertuan Agong Al-Sultan Abdullah Ri’ayatuddin Al-Mustafa Billah Shah, kemari.
Pekara nya, nyapai ‘imuniti kelompok’, perintah ke kering sereta tegap enggau pelin mulaika pemanah ekonomi sekumbang ngemunaska igi penyakit COVID-19.
Kepala Menteri Datuk Patinggi Abang Johari Tun Openg mantaika pekara nya nengah aum video ba Opis Kepala Menteri ditu.
Sama bisi engagu maya nya, Presiden Parti Rakyat Sarawak (PRS) Tan Sri Datuk Amar James Jemut Masing, Presiden Parti Rakyat Bersatu Sarawak (SUPP) Dato Sri Dr Sim Kui Hian enggau Presiden Parti Demokratik Progresif (PDP) Dato Sri Tiong King Sing.
Dalam penerang begulai ti disain ketiga-tiga ketuai parti komponen Gabungan Parti Sarawak (GPS) nya madah, sida setuju enggau tiga pekara ti dikenataika Abang Johari ke mega Chairman GPS kena napi COVID-19 nyengkaum mutarka pekara ekonomi.
“Kami ke nyadi ketuai PRS, SUPP sereta PDP setuju enggau tiga nya kena menaska COVID-19 nyengkaum chara nyaga ekonomi ti udah dipunka Abang Johari ngagai Yang di-Pertuan Agong maya sesi baum enggau iya sehari tu (kemari),” ku sida dalam penerang nya kemari.
Ku sida, dua pekara ke beguna amat mega dibantaika maya nya, iya program vaksinasyen deka dikejampat sereta diputarka dalam bulan Ogos ba pengeran nyapai ‘imuniti kelompok’ kelimpah bejalaika Pelin Mulaika Pemanah Ekonomi pengudah COVID-19.