PPV di Bintulu dipelaba deka ditambah: Tiong
KUCHING: Penyampau Palan Nuchuk Vaksin (PPV) dalam kandang menua Bintulu dipelabaka deka ditambah kena nangkup peminta vaksinasyen nyengkaum nyapai juluk ‘imuniti kelompok’ enggau naka pengelengkas.
Kaban Parlimen Bintulu, Dato Sri Tiong King Sing madah, sida diatu benung ngaga pansik kena nambahka penyampau PPV ba kandang menua ti dedat diuan mensia mayuh.
“Taja pan bisi beberapa buah palan vaksinasyen di Bintulu, tang nya bedau chukup kena nangkup guna mensia mayuh.
“Nya alai, kami benung mansik numbuhka palan vaksinasyen tambah ari mayuh bengkah perspektif nyengkaum ngambi pengereja pengawa tambah sereta ngelala palan ke engkeman, pemesai endur enggau ke bukai. Tuju tu endang kena ngenyampatka proses vaksinasyen ungkup rayat Bintulu,” ku iya madah nengah Facebook iya kemari.
Ku Tiong, iya udah ngabas dua PPV sereta meresa kandang endur di Kidurong ti tau digagaka PPV.
“Kandang endur ke diabas kami nya tetangkupka kriteria digagaka PPV,” ku iya.
Iya mega ngansak sektor industri enggau industri besai bekerejasama enggau perintah dalam program vaksinasyen pekereja industri.
Taja pia ku iya, pengaji mesti nanggung ungkus ke bekaul.
Berebak enggau nya, Tiong ngelalau mensiia mayuh ngambika datai ngagai program vaksinasyen nitihka semaya ti ditetap ke diberi nengah aplikasyen MySejahtera ngambika enda lama nganti sereta berebut.
Ku iya, semua proses vaksinasyen diperambu enggau silik lalu semua pen gereja pengawa nyengkaum tusun kereja digaga enggau manah.
“Taja pia, bisi sekeda orang ke ngelih baris sereta datai tumu beberapa jam sebedau jam ti ditetapka, tang udah nya asa ati ti ngujungka charut enggau staf di PPV.
“Ulah ke baka tu kelalu balat sereta dikeenggaika. Mensia mayuh semina tau datai ba PPV nitihka jam ti disemaya, semua orang bisi peluang dituchuk vaksin, anang ngelih baris ti tau ngujungka penyarut tau nyadi,” ku iya.
Berebak engagu nya mega, iya minta polis mansik silik sesapa ti ngepunka penyarut nengah chara nyadung nya dalam media sosial sepeneka ati ti tau ngeruga pengelikun mensia mayuh.
“Enti pekara ke baka tu majak nyadi sereta ditejuka pia aja, nyentuk ke kemaya rayat kitai nemu bedisiplin, bekerejasama sereta beserakup lalu nyentuk ke kemata mih penyakit tu tau punas?,” ku iya nyemetak.