Vaksin Cansino COVID-19 dikemendarka dikena di Sarawak

Vaksin COVID-19 dos tunggal nya engkeman amat enggau gaya senario peranak menua pesisir di Sarawak

“Di Sarawak,kitai bisi peranak ke diau ba kandang endur ke besai ba kandang menua ulu entigis, lalu bisi penanggul ba perengka pengangkut sereta mar ungkus.

Datuk Amar Douglas Uggah Embas

Chairman Komiti Mutarka Penusah Ngenyit Nengeri Sarawak (JPBNS)

KUCHING: Sarawak nyambut manah pekara ti dibantai Ketuai Direktor Pengerai, Tan Sri Dr Noor Hisham Abdullah ti udah meri pemendar ke bisi penetap ungkup produk vaksin ti semina begunaka siti tuchuk dos.

Chairman Komiti Mutarka Penusah Ngenyit Nengeri Sarawak (JPBNS) Datuk Amar Douglas Uggah Embas madah, vaksin COVID-19 dos tunggal nya Convidecia Recombinant Novel Coronavirus Vaccine (Adenovirus Type 5 Vector), dikeluarka CanSino

Biologics Inc, China, engkeman amat enggau gaya senario peranak menua pesisir di Sarawak.

Berebak enggau nya, Uggah meri terima kasih ngagai Opis Menteri Pengerai Malaysia (KKM) laban udah ngaga pemutus ke betul sereta jampat.

“Di Sarawak, kitai bisi peranak ke diau ba kandang endur ke besai ba kandang menua ulu entigis, lalu bisi penanggul ba perengka pengangkut sereta mar ungkus.

“Nya alai, vaksin COVID19 ke bisi dos tunggal seperti Cansino endang engkeman amat dikena ba program vaksinasyen ungkup raban tu,” ku iya nengah siti penerang kemari.

Ku iya, tim perubat semina ngelawa palan nya sekali aja lalu tu deka ngurangka belanja, penyuah pejalai, pemar enggau risiko ke nyadi.

“JPBNS udah minta perintah besai ngungkupka vaksin ke patut ngagai Sarawak enti stok vaksin nya udah bisi.

“Tu tentu deka ngenyampatka tagit nengeri nembuka program vaksinasyen dalam bulan Ogos taun tu,” ku Uggah.

Dulu ari nya KKM madahka, Aum Raban Bekuasa Nagang Dadah (PBKD) ke baum ensanus (15 Jun) setuju meri pemendar rejista bisi penetap ke guna maya bisi penusah ngenyit dua produk vaksin ti semina beguna tuchuk siti dos.

Nya Convidecia Recombinant

Novel Coronavirus Vaccine (Adenovirus Type 5 Vector), ti dikeluarka CanSino Biologics Inc, China (pemegai rejista produk: Solution Biologics Sdn. Bhd.) enggau Janssen COVID-19 Vaccine dikeluarka Johnson & Johnson ti udah diberi pemendar Dirintaika Dikena Maya Bisi Penusah Ngenyit (Emergency Use Listing tauka EUL) ari Gerempung Pengerai Sedunya (WHO).

KKM mega madahka pemendar ngerejista bisi penetap tu begunaka penerang kualiti, pengelikun enggau penyemitan produk vaksin dipatau sereta diperati belama bepelasarka data ke diatu.

Nya kena nen tuka banding ba pemaik-risiko (benefit over risk) ba produk vaksin nya mengkang positif.

Berebak enggau nya, KKM madahka sida seruran ngangkatka tikas pengerai mensia mayuh ba pengawa ngelaban penyakit COVID19 nengah chara ngulihka vaksin ke udah diperatika ari sukut kualiti, pengelikun enggau penyemitan ari Seksyen Regulatori Farmasi Menua (NPRA) sereta dikemendarka PBKD.