JPBNS: Lima kluster baru ditemu di nengeri tu

KUCHING: Opis Pengerai Nengeri Sarawak (JKNS) nengah Komiti Mutarka Penusah Ngenyit Nengeri Sarawak (JPBNS) ngenukuka bisi lima kluster baru di nengeri tu.

Kluster nya, Kluster Jalai Daya enggau Kampung Muara Tebas (Kuching), Kluster Dulang (Subis), Kluster Nanga Strass (Meradong) enggau Kluster Nanga Sejugam (Julau), ke alai semua kluster tu bekaul enggau kluster komuniti di genturung pendiau enggau endur gawa.

Kluster Jalai Daya ditu, siti kluster ke nyadi ba endur gawa, ditemu ba sebuah kilang memproses pemakai tasik ba palan industri di Pending, ke bepun ari pengawa sereta kaul rama ba sida ke gawa ba kilang nya.

Sida ke ditemu positif iya nya pengereja pengawa ke diau ba rumah pengereja pengawa kilang nya di Jalai Daya ditu. Urung 153 iku pengereja pengawa tu udah nya diperesa, alai 27 kes ditemu positif nyengkaum kes indeks; 50 kes lalu 76 kes agi nganti pemutus makmal.

“Semua kes positif udah nya dipasuk ngagai Sepital Besai Sarawak tauka HUS enggau palan kuarantin PKRC ditu,” ku JPBNS.

Kelimpah ari nya, di Kuching ditu bisi Kluster Kampung Muara Tebas ke ditemu ba sekeda ruang bilik di genturung pendiau di Kampung Muara Tebas, ke bepun ari pengawa rama enggau kaul ba sida ke diau di genturung pendiau dia.

“Urung 17 iku bisi diperesa, ke alai 14 kes ditemu positif nyengkaum kes indeks; tiga kes (negatif). Semua kes positif udah nya dipasuk ngagai HUS enggau palan kuarantin PKRC,” ku JPBNS baru.

Kluster ketiga, iya nya Kluster Dulang di Subis (Miri), iya nya siti kluster endur gawa ke ditemu ba ladang sawit ke agi ari baruh Atur Nagang Pemindah Diteritka Agi (PKPD) di pelilih Suai, Subis bekaul enggau pengawa rama sereta kaul ba sida ke gawa ba ladang nya.

“Urung 289 iku pengereja pengawa dia diperesa,ke alai 39 kes ditemu positif nyengkaum kes indeks; 249 kes (negatif) lalu semina siti kes ke agi nganti pemutus makmal. Semua kes positif udah nya dipasuk ngagai Hospital Miri, sEpital Bintulu enggau palan kuarantin di Miri enggau Bintulu,” ku JPBNS.

Nangkan nya, Kluster Nanga Strass di Meradong, iya nya kluster di sebuah rumah panjai ka ari baruh PKPD di Nanga Strass di Meradong, bekaul enggau pengawa rama enggau kaul ba sida ke diau ba rumah panjai nya.

“Urung 72 iku sida ke diau ba rumah panjai nya bisi diperesa, ke alai 29 kes ditemu positif nyengkaum kes indeks; 40 kes (negatif) lalu tiga iti kes agi nganti pemutus ari makmal. Semua kes positif udah nya di pasuk ngagai Sepital Sarikei enggau PKRC di pelilih menua tu,” ku JPBNS.

Kluster kelima iya nya Kluster Nanga Sejugam di Julau, ti mega siti kluster ditemu ba sebuah rumah panjai di Nanga Sejugam dalam sitak Julau bekaul enggau pengawa rama enggau kaul ba sida ke diau ba rumah panjai nya.

“Urung 148 iku sida tu udah diperesa,ke alai 64 kes ditemu positif nyengkaum kes indeks; 84 kes (negatif). Enggau nya, sida ke positif dipasuk ngagai palan PKRC ditu,” ku JPBNS.

Kelimpah ari nya, kluster ke udah abis timpuh kuarantin, JPBNS madahka dua kluster udah chukup timpuh lalu nadai kes baru bisi diripot ngagai JPBNS dalam kandang 28 hari bekaul enggau kluster tu.

Kluster ke udah chukup timpuh nya, Kluster Long Jegan, Beluru enggau kluster Jalai Sultan Tengah, Kuching.

“Bisi 86 kluster agi aktif di Sarawak lalu 13 ari kluster tu bisi ngerikod 172 kes baru nambah, lalu 73 kluster nadai ngerikod penambah kes,” ku JPBNS.