Pengawa numbuhka PPV Mobile di Bawang Assan dipuji
SIBU: Peranak dalam sitak Bawang Assan muji atur opis bekuasa numbuhka Palan Nuchuk Vaksin (PPV) Mobile ba Balai Mensia mayuh Bawang Assan.
PPV nya ke udah dibuka kenyau ari Hari Enam nyin tadi nyentuk kemari, ngemudahka peranak ba kandang menua nya betuchuk vaksin COVID-19, sereta tau enda betuchuk ngagai endur ke jauh.
Enti PPV Moobile ba Balai Mensia mayuh Bawang Assan tu nadai, sida enggai enda pan ngagai PPV di Stadium Tetutup Sibu tauka sepital enggau klinik pengerai ke bukai.
Ku penerima vaksin, Karmila Galau, 43, pemisi PPV nya ngelimat jam iya enggau peranak rumah panjai ngambika betuchuk vaksin COVID-19.
“Enti nadai PPV ba Balai Mensia mayuh Bawang Assan tu, kami engka betuchuk vaksin ke Stadium Tetutup Sibu tauka PPV bukai.
“PPV itu ngemudahka peranak dalam kandang Bawang Assan betuchuk vaksin, kelimpah ngelimatka jam enggau belanja,” ku iya ke dirandau pengudah betuchuk dos keterubah vaksin Sinovac.
Iya ke datai ari Rumah Joseph Jarrau, Tanjung Bekakap semina begunaka urung 10 minit batai ba PPV nya nengah jalai darat.
“Enti ke PPV di Stadium Tetutup Sibu, peengelama pejala nya engka lebih setengah jam,” ku iya.
Siku agi penerima vaksin, Nacha Payu, 80, berasai gaga ati laban bisi PPV Mobile ba Balai Mensia mayuh Bawang Assan.
“Ungkup orang lunggar umur, mar kami deka mindah jauh.
“Tambah enggau umur ke udah lunggar tu, mar deka mindah.
“Terima kasih ngagai opis bekuasa laban udah nyendiaka perengkaguna tu ti ngemudahka kami betuchuk vaksin,” ku iya ti ngelawa PPV enggau anak iya ngena mutosikal.
Nacha ke asal ari Rumah Joseph Jarrau madah,enti diasuh ngagai PPV di Stadium Tetutup Sibu, iya engka enggai enda pan numpang orang bukai.
Iya ke betuchuk dos keterubah vaksin mega madahka proses ba PPV Mobile nya manah amat sereta lanchar.
PPV Mobile ba Balai Mensia mayuh Bawang Assan tu deka nuchuk peranak ari 37 rumah panjai ari Bawang Assan, Sungai Melanggan, Sungai Apong, Tanjung Bekakap, Sungai Tebelian, Sungai Lengan, Tanjung Keling, Sungai Lasa enggau Sungai Pasin.
Dipadahka, PPV tu nuchuk 500 iku sehari sereta mantu perintah nyapai imuniti kelompok ba sitak Bawang Assan.