Penyulut rikod kereja Datuk Amar Ahmad Tarmizi patut diberi tanda basa: Soon Koh
KUCHING: Rikod kereja ke nyulut ex-Sekretari Pekara Wang Nengeri, Datuk Amar Ahmad Tarmizi Sulaiman pengelama 17 taun patut diberi tanda basa.
Presiden Parti Sarawak Bersatu (PSB) Dato Sri Wong Soon Koh madah, ari baruh pegai iya Sarawak mujur bulih ‘persijilan bersih’ ngaduka akaun perintah nya ari taun ke setaun bejurut sekumbang 17 taun mangku pengawa nya ti mandangka atur pengawa ke manah dikemeran sereta dikemeratka.
“Tu mega mandangka chara ngatur pekara wang ke chukup manah.
“Kelimpah ari nya, firma meri basa antarabansa, Moody enggau Standard & Poor’s udah suah ngenanka Sarawak ngerikodka ‘pensijilan bersih’ sekumbang pengelama 17 taun iya kereja, endang ‘penilaian kredit’ ke tepuji,” ku iya nengah penerang berita ensana.
Wong ke mega exMenteri Wang Kedua madah, tanda basa ke diberi nya mandangka rikod ngadu enggau prestasi wang ke tegap disukung rizab ke teguh enggau chara ngena belanja ti pintar.
“Ari baruh pegai iya, rizab nengeri majak ngerembai ari semina RM5 bilion ba taun 2004 lalu lebuh iya mangku pengawa nya, rizab nengeri nambah ngagai RM31 bilion ba taun 2019.
“Penyulut tu, endang asil ari budaya bedisiplin belama ti dikemeranka iya lebuh ngaduka pekara wang nengeri ngelama tu,” ku iya.
Taja pia, Wong madahka diri alit ati laban Ahmad Tarmizi ngelengkaka pangku pengawa nyadi Sekretari Pekara Wang Nengeri nya dipeda baka ke ngenyit.
Ku iya, Ahmad Tarmizi baru beumur 58 taun sereta bedau daytai ba maya pinchin.
“Kitai deka nemu nama kebuah Perintah Gabungan Parti Sarawak (GPS) ngemendarka siku orang ke bekaliber baka Ahmad Tarmizi ngelengkaka pangku pengawa nya ba maya ke berat diatu, maya nengeri betapi enggau pemar enggau mayuh bengkah bidang, ti nadai kala ditapi sebedau tu nyengkaum ngenanka penuduk fiskal ke tegap.
“Beratika gaya pemar ekonomi enggau wang ke ditapi ba jam ke diatu, kitai begunaka orang ke bepenau, landik enggau peneleba iya (Ahmad Tarmizi) kena mantu kitai mutarka maya ke mar diatu.