Projek Palan Mansik Penyakit Berampit deka berengkah digaga dalam taun tu
KOTA SAMARAHAN: Projek ngaga Palan Mansik Penyakit Berampit Sarawak deka berengkah dipejalaika enda lama agi, pia ku Kepala Menteri Datuk Patinggi Abang Johari Tun Openg.
Ku iya, nya berindik ari palan projek diatu udah ditetapka semak enggau Sepital Jantung Sarawak di Kota Samarahan.
“Kemari kami udah ngemendarka siti palan semak enggau Sepital Jantung HUS alai ngaga pansik penyakit berampit lalu kereja ngaga nya deka berengkah enda lama agi dalam kandang taun tu.
“Kami nagit pengawa ngaga nya ditembuka dalam timpuh tiga taun laban palan tu begunaka infrastruktur baka makmal, laban nya bepanggai ba pansik ti dipejalaika raban profesional
“Nya alai perintah udah ngemendarka RM200 juta kena ngaga palan betikas antarabansa ti nunda beberapa model nyengkaum ari Singapura,” ku iya maya ba aum media pengudah nemuai ngagai Palan Nuchuk Vaksin (PPV) di Universiti Malaysia Sarawak (Unimas) ditu, kemari.
Tambah Abang Johari, palan nya deka dikemansangka begulai enggau tebangkar ari
Unimas nyengkaum Profesor Datuk Dr Andrew Kiyu Dawie sereta ex- Direktor Pengerai Nengeri, Datuk Dr Jamilah Hashim sereta gerempung antarabansa ti deka ngaduka pengawa ba palan nya.
Ku, enggau pemisi palan nya Sarawak tau jampat agi ngelala igi penyakit dudi ila, kelimpah ari vaksin.
“Kitai kaya enggau jalai pemisi sereta biodiversiti, diatu kitai semina deka ke pengelandik ba pengawa ngemansangka palan tu, nyengkaum ari Unimas enggau antarabansa.
“Kitai enda tau enda nyingkang ke mua dalam polisi kitai kelebih agi ba pengawa kitai mutarka pandemik ke bukai jemah ila,” ku iya.
Ku Abang Johari, taun nyin kemari perintah udah ngaga pemutus numbuhka siti palan mansik penyakit beampit ti mega keterubah di Malaysia.
Sama bisi enggau nemuai, Sapit Kepala Menteri Datuk Amar Douglas Uggah Embas sereta Mandal Canselor Unimas, Profesor Datuk Dr Mohamad Kadim Suaidi.