NGO ngansak ngambika proses vaksinasyen jampat agi dipejalaika di Sarawak
MIRI: Beberapa buah gerempung ukai dikuasa perintah (NGO) di nengeri tu, mantaika pengirau ati sida ketegal chara perintah nengeri ti dipeda laun nuchuk vaksin ba rayat.
Kami beratika proses vaksinasyen di Sarawaklubah sereta amat enda ngelantangka ati. Kami ngarapka perintah jampat agi bejalaika pengawa bekaul enggau pengerai rayat. Anang semina jampat ngereja pengawa ba pekara politik aja.
“Mayuh sebana baka ari apai indai ke udah beumur 60an sereta ditepan penyakit bedau betuchuk vaksin taja pan udah ngerejista diri ari pun suba, nyentuk ke bisi sekeda rayat madahka penyanggup ngemansutka duit kediri empu kena meli vaksin nya.
“Proses nuchuk vaksin tu dipeda bisi lubah. Laun nuchuk vaksin tu endang enda ulih diterima. Mesti dikelengkaska,” pia ku penerang nya.
Berebak enggau nya, dalam penerang ke digaga begulai presiden Serakup Pemikir Dayak Sarawak (DTTAS), Elias Lipi Mat enggau presiden, Edward Awan; presiden Kongress Kebangsaan Dayak (DNC), Paul Raja; presiden Serakup Iban Sarawak (PAIS), Samuel Suring; sekretari Serakup Dayak Iban Sarawak (SADIA) Pampang Miri, Rafael Dru; presiden Serakup Terabai Menua Sarawak, Wilfred Nissem enggau sekretari besai Serakup Balang Balai Nyabung (BBN), Dr John Brian, ngerintaika empat iti langgur penemu ngagai perintah nengeri kena ngenyampatka program vaksinasyen nya.
“Dalam penerang ke digaga begulai tu, kami ngerintaika langgur penemu keterubah iya nya ngenyakahka kerejasama enggau mayuh bengkah raban ngambika nyaup ba proses ngerejista rayat di menua pesisir Sarawak dalam Program Imunisasyen Covid19 Menua (PICK).
“Kedua, perintah nengeri patut nyendiaka stok vaksin ke chukup ungkup rayat Sarawak lalu diberitaka Sarawak udah nerima 380,000 vaksin bansa Sinovac, lalu kami ngarapka perintah nengeri majak bebendar agi nyapai tikas ‘imuniti kelompok’ ,” pia ku sida.
Langgur penemu ketiga NGO ke enggau nya nyaup ngemayuhka agi Palan Nuchuk Vaksin (PPV) nitihka penengkeman endur, kelebih agi di menua pesisir enggau kandang menua ulu entigis sereta nyendiaka PPV mobile kena ngenyampatka program vaksinasyen, kelebih agi ba kandang menua ulu entigis.
Keempat iya nya ngambika perintah nengeri ngena chara ke lebih komprehensif ungkup peranak ti diau di menua pesisir enggau kandang menua ulu entigis , ngambika sida nemu silik pasal pemesai guna vaksinasyen.
Nya alai NGO nya madah, rayat meri pengandal ke besai ngambika program vaksinasyen tu ulih dikelengkaska kena ngenukuka pengelikun enggau pengerai sida, lalu ngambika Atur Nagang Pemindah (PKP) enda dipejalaika agi sereta nadai agi ripot kes COVID19 ti manggai ba digit beribu ninting hari.
“Taja pia n yentuk ke sehari tu, mayuh agi sida tu bedau dikangauka betuchuk.
“Nama perintah empu madahka diri balat kena tating ketegal empas ari COVID-19? Tang ba timpuh ke sama sistem nuchuk vaksin nya lubah amat sereta nadai nyaup mutarka penanggul tu enggau jampat,” ku penerang nya.
“Pengawa ngemunaska COVID-19 ukai semina nengah chara nitihka prosedur operasyen standard (SOP) ti ditetapka sereta bejuraika penemu pasal nya, tang pekara ti pemadu beguna sereta ngirauka ati iya nya ngerejista diri enggau vaksinasyen rayat Sarawak,” pia ku penerang sida.
Penerang nya mega madah, enti penyampau rampit kesenda diputarka ari diatu, Sarawak deka begunaka timpuh ke lama agi baru ulih mutarka penyampau ke dirampit nya.
“Nitihka ripot ti dipansutka kena 15 Jun 2021 (Hari Dua) Sarawak ngerikod penyampau ke berampit iya nya 718. Penyampau tu meri mesej ti amat ngirauka ati. .”
“Tu mih maya perintah nengeri bejalaika pengawa proaktif agi ngambika penyampau ke di rampit nya ulih dijaga laban kami enggai meda mayuh orang parai sekumbang ke nganti program vaksinasyen penuh berengkah,” pia ku penerang sida.