1,331 udah tembu vaksin di Kapit, Bukit Mabong

SIBU: Bisi 1,331 inidividu udah tembu betuchuk dua dos vaksin nengah Program Imunisasi COVID-19 Menua (PICK) di pelilih menua Kapit enggau Bukit Mabong.

Pemesai Opis Pengerai Bagi Menua Kapit Dr Hamidi Sharkawi madah, penyampau tu iya nya penerima vaksin di kededua pelilih menua nya ungkup renggat keterubah betuchuk vaksin COVID19.

Ku iya, pelilih menua Belaga ngerikodka udah meri dua dos vaksin ti kedua pemadu tinggi iya nya 344 iku, lalu ditangkan Song 247 iku sereta Asap 292 iku.

“Ungkup renggat kedua pelilih menua Kapit enggau Bukit Mabong ngerikodka 1,543 iku penerima vaksin dos keterubah sereta 1,188 dos kedua, ditangkan Song (3,388 dos keterubah enggau 1,250 dos kedua), Belaga (1,533 dos keterubah enggau 643 dos kedua) lalu Asap (3,358 dos keterubah),” ku iya lebuh ti ditelefon kemari.

Nitih ku Dr Hamidi, Unit Mindah Kin Kitu Raban Vaksinasyen COVID-19 Bagi Menua Kapit berengkah bejalaika operasyen rasmi kena Hari Satu tu tadi lalu bejalaika pengawa meri tuchuk vaksin ngagai komuniti di kandang menua pesisir.

Ku iya, ba pelilih menua Kapit, raban tu udah singgah di Kampung Sawang ke alai bisi 539 peranak udah nerima tuchuk vaksin, Kampung Kemarawa (240), Sekula Primari (SK) Lepong Baleh (519), SK Melipis (161), SK Ibau (207), Rh Kiong, Rh Remong dan Rh Unjah (2400), Rh Rachman, Rh Paul enggau Rh Nelson 278.

Dr Hamidi mdah, ungkup pelilih menua Bukit Mabong, bisi 160 iku di SK Mujong, Rh

Jimbun, Rh Sumbang enggau Rh Wong udah nerima tuchuk vaksin COVID-19 lalu ditangkan Rh Lamau, Rh Ingoh, Rh Ikau, Rh Manggan, Kem A2 Balleh, Rh Agang, Rh Anting dan Rh Wong 160, SK Tunoh (198) enggau SK Oyan Tengah (211).

Pia mega di pelilih menua Song, vaksinasyen nya diberi ba Klinik Pengerai Tekalit ke alai bisi 500 iku udah nerima tuchuk dos keterubah vaksin.

“Ungkup pelilih menua Belaga iya nya di kandang menua Punah Bah, bisi 133 individu udah tembu da dos tuchuk vaksin lalu 200 agi baru udah nerima tuchuk keterubah dos vaksin COVID-19,” ku iya nerang.

Ku iya, di kandang menua Asap, Belaga, program vaksinasyen diperambu berengkah dalam minggu ti deka datai tu.