Tiga kluster baru COVID-19 ditukuka di Sarawak kemari
KUCHING: Opis Pengerai Nengeri Sarawak (JKNS) naka kemari ngenukuka tiga kluster baru, nyengkaum Kluster Gran Stumbin di Sri Aman, ke nyadi bepun ari pengawa nyengai pemati di pelilih menua nya.
JKNS nengah Komiti Mutarka Penusah Ngenyit Nengeri Sarawak (JPBNS) madahka kluster tu siti kluster komuniti ke ditemu bekaul enggau sekeda genturung pendiau rumah panjai di Gran Stumbin, Tanjung Bijat, Sri Aman ke bepun ari pengawa nyengai antu di sebuah rumah panjai di sitak nya, kena 6 Jun tu tadi.
Urung 620 iku peranak ke diau di genturung pendiau nya udah di anjung beperesa, lalu 82 kes ditemu positif COVID19 nyengkaum kes indeks, lalu 124 kes negative.
“Taja pia, 414 kes agi nganti pemutus ari makmal.
“Ke semua kes positif udah nya dipasuk ngagai Sepital Umum Sarawak (HUS), Sepital Sri Aman enggau palan kuarantin PKRC di Sri Aman. Kaul ngagai kes positif ditu mega udah di asuh kuarantin lalu udah dipasuk ngagai palan kuarantin di Sri Aman.
“Ari kluster tu mega, bisi ngerikod siti kes pemati ketegal positif COVID-19,” ku JPBNS.
Kelimpah ari nya, dua kluster bukai dirikod kemari, iya nya di Bintulu, Kluster Jalan Tanjung Kidurong 3 enggau Kluster Jalan Bintulu-Tatau.
Kluster Jalan Tanjung Kidurong 3, bekaul enggau kluster endur gawa ke ditemu ba kuarters pengereja pengawa sebuah kompeni pengangkut di Jalan Kidurong, ditu ke bepun ari pengawa rama sereta kaul sida ke gawa ba kompeni nya.
“Urung 102 iku pengereja pengawa ba endur nya udah diperesa pengerai, alai 33 kes ditemu positif COVID-19 nyengkaum kes indeks, lalu 69 kes agi nganti pemutus makmal.
“Semua kes positif udah nya dipasuk ngagai Sepital Bintulu enggau palan kuarantin PKRC ditu. Endur gawa dia mega di terit enggau Atur Nagang Pemindah Diteritka Agi (PKPD),” ku JPBNS.
Nangkan nya, Kluster Jalan Bintulu-Tatau, mega siti ari kluster komuniti ke ditemu ngerekai di genturung pendiau rumah panjai di Jalan BintuluTatau, bepun ari pengawa rama sereta kaul ba sida ke diau di rumah panjai nya.
“Urung 151 udah dianjung beperesa, alai 24 kes ditemu positif COVID-19 nyengkaum termasuk kes indeks, 82 kes (negatif) sereta 45 kes agi nganti pemutus makmal.
“Ke semua kes positif udah nya dipasuk ngagai Sepital Bintulu sereta palan kuarantin ditu. Genturung pendiau dia pan lalu diteritka agi atur nengah PKPD,” ku JPBNS.
JKNS nengah JPBNS mega madahka sida iya ngesah bisi siti kluster udah tembu timpuh kuarantin, iya nya Kluster Rayang, di Serian laban nadai kes baru nambah dalam kandang 28 hari tu.
Kelimpah ari nya, kluster ke agi aktif, bisi dalam 88 kluster, lalu 10 ari nya bisi udah nambah 40 kes baru, lalu 78 kluster, nadai ngerikod penambah kes.