Mayuh agi PPV COVID-19 deka dibuka di Bintulu
BINTULU: Mayuh agi Palan Nuchuk Vaksin (PPV) deka ditumbuhka di Bintulu dalam pengawa ngelengkaska pengawa betuchuk vaksin ba bagi menua tu kena nyapai imuniti beraban ti lalu ulih kena nagang pengelekai igi penyakit COVID-19.
Entara PPV ti diperambu iya nya Palan Lumba enggau Main Kaunsil Pemansang Bintulu (BDA) Kidurong enggau Auditorium Wisma Bintulu.
Kaban Parlimen (MP) Bintulu Datuk Seri Tiong King Sing madah, dalam pengawa ngelengkaska program meri vaksin kena nyapai imuniti beraban, sida udah matau gaya Palan Lumba enggau Main BDA Kidurong sereta Auditorium BDA Wisma Bintulu.
“Tu entara palan ti engkeman ungkup pengawa ngerejista vaksinasi sereta betuchuk vaksin ngagai penerima. Kitai deka nganjung perambu tu ngagai Komiti Mutarka Penusah Ngenyit Nengeri Sarawak (JPBNS) ngambika ngena dua palan tu,” ku iya dalam penerang kemari.
Iya madah, ungkup dewan auditorium deka nyendiaka servis ungkup raban pedagang pasar tamu, pasar malam enggau pasar besai sereta mega ruang bilik sida, lalu palan lumba enggau main deka dikena ungkup peranak ari enggau di kandang menua Sungai Plan sereta Rancangan Perumahan Rakyat (RPR) Kidurong.
“Nyema keretas kereja bekaul dua palan tu dikemendarka, tu deka nentuka pemayuh penerima vaksin dalam timpuh sehari di Bintulu deka nambah,” ku iya.
Pia mega ku iya, minta Opis Pengerai Nengeri Sarawak ngambika nyendia mayuh agi staf sereta pemisi ngambika mayuh agi ulih bejalaika tanggungpengawa dalam pengawa meri vaksin.
“Tikas vaksinasi nambah ninting hari tang ke nyaga mayuh agi nyawa, nya alai kitai mesti bejalaika program tu enggau naka pengelengkas sereta manah,” ku iya nambah.
Beserimbai enggau nya, ku iya baru, penerima vaksin patut nitihka atur semaya sereta nyeliahka ari ti bededat.
“Aku minta semua orang ngambika datai ke palan meri vaksn nitihka atur semaya sereta jam ti udah ditetapka. Bisi kes penerima ti udah ditetapka atur semaya sida lemai tang udah enggau berintai tumu pukul 6 pagi,” ku iya.
Ku iya madah, gaya tu ti ngasuh palan nyadi sekut lalu ngujungka mayuh orang ti berntai sereta nganti ba tengah panas.
“Bisi mega ti ngena peluang nya ngambi gambar lalu ngengkahka nya dalam media rama. Gaya tu ti ngujungka penerang ti enda betul dikerembai lalu tu mantaika (servis) raban ti bekuasa enda manah,” ku iya nyemetak.
Berindik ari nya, ku iya nandu, semua raban patut bekerejasama bejalaika tanggungpengawa sida, nitihka atur semaya ti ditetapka lalu nyeliahka penanggul sereta jaku selebubu ti enda betul.
“Enggau chara tu, kitai ngarapka program vaksinasi dipejalaika enggau manah lalu semua orang deka ngulihka tuchuk vaksin lalu ulih idup baka selama,” ku iya.
Sama bisi dalam pengawa matau tu iya nya Menijer Besai BDA Muhamad Yakup Kari, Pemesai Opis Pengerai Bagi Menua Bintulu Dr Melvin Chung enggau pemesai kanan BDA ke bukai.