Abang Johari enda nyima ati leka jaku ‘ketek’ enggau ‘sik berasa’ benung dikerembaika diatu
Premier Sarawak Datuk Patinggi Tan Sri Abang Johari Tun Openg ngembuan runding ke tebuka enggau leka jaku ‘ketek’ enggau ‘sik berasa’ ti benung dikerembaika diatu.
Iya mega enda nyima ati enggau ulah mensia mayuh kelebih agi penguna media sosial ti suah ngena kededua leka jaku nya.
Iya mega nyambut manah respons mensia mayuh ti ngerembaika klip video nya ti nyebut leka jaku nya ba media sosial.
“Kitai diatu dalam dunya digital lalu semua nya ‘ketek’. Maya kitai ngemansutka duit ari ATM, kitai semina ‘ketek’ aja, bebida enggau gaya ke sebedau tu.
“Kitai mega baru udah ngintut Hari Raya Aidilfitri lalu enda lama agi kitai deka ngintu Hari Raya Aidiladha. ‘Sik berasa’,” ku iya lebuh bejaku maya Pengerami ‘Ramah Tamah Warga Media’ ba Hotel Pullman ditu, malam ensanus.
Diatu, klip Abang Johari ti suah ngena leka jaku ‘ketek’ enggau ‘sik berasa’ nyadi perati mensia mayuh sereta dikerembai dalam media sosial.
Leka jaku ‘ketek ajak’ enggau ‘sik berasa’ disebut Abang Johari maya pengerami bejadi Opis Multimedia Sarawak (SMA) enggau Polis Ekonomi Digital Sarawak dalam taun 2017.
Iya ngena leka jaku nya kena ngenang pasal teknologi digital ti balat ngerembai diatu kena ngemudahka pengawa ti digaga ninting hari.
Iya madahka pemansang kemajuan teknologi nya mega kena matau sekeda projek pemansang ti benung digaga di negeri tu.
Leka jaku nyadi ke main bala netizen kelebih agi di Samarahan maya Pengawa
Bepilih Negeri Ke-12 (PRN12) bekaul enggau isu jalai alun ba sitak Asajaya sereta jalai Samarahan Expressway ti balat sekut ketegal projek ngangkatmanah ‘roundabout’ bulatan dia ti tejanggal.
Nambahka nya, media bisi ngena leka jaku nya maya ngaga berita.