Perintah Sarawak merambu minta nambahka penyampau pengari rayat ari negeri tu ba Parlimen
Perintah Sarawak merambu minta ngagai perintah besai bekaul enggau nambahka penyampau pengari rayat ari negeri tu ba parlimen.
Sapit Menteri ba Opis Premier Sarawak (Undang-Undang, MA63 enggau Kaul Perintah Negeri – Perintah Besai) Datuk Sharifah Hasidah Sayeed Aman Ghazali madah, pekara nya beguna amat setipak enggau pekara ti diungkup tauka ditetapka maya numbuhka menua Malaysia.
Iya madah, kena 15 Februari 2022 perintah Sarawak udah ngubah konstitusyen negeri Sarawak, lalu entara nya nyengkaum definisyen perintah besai ambika ngaku penuduk Sempekat Malaysia 1963 (MA63), enggau ubah konstitusyen perintah besai ti diteritka berengkah 11 Februari 2022.
“Ubah ngagai gela kepala menteri ngagai premier dalam konstitusyen negeri Sarawak udah ngangkatka status Sarawak lalu nya ngeletakka Sarawak ba penuduk ti bebida enti dibandingka enggau negeri bukai di Malaysia, nyadi siti wilayah ke udah numbuhka perintah besai Malaysia.
“Enggau ubah ke udah digaga, perintah Sarawak merambu deka minta ngagai perintah besai nambahka penyampau pengari rayat (ari negeri tu) ba parlimen.
“Pekara tu udah dikenataika ngagai perintah besai nengah aum Kaunsil Khas pasal MA63 ti bechairmanka Menteri Besai (PM),” ku Sharifah Hasidah lebuh nyaut tanya tambah ari Mohamad Chee Kadir (GPS - Kabong), kemari.
Hasidah nerangka pekara tu maya sesi tanya saut ba Hari Ketiga Aum Kedua Penggal Keterubah Kunsil Negeri Sarawak Ke-19 ba Kompleks DUN Sarawak ditu.
Ditanya bekaul enggau pengelama timpuh deka ngelala bagi enggau minta pulai hak Sarawak bepalasarka MA63 enggau Konstitusyen Perintah Besai, Hasidah madahka perintah negeri kebendar iya nagit deka mutarka pinta nya enggau naka pengelengkas, tang bisi sekeda konstitusyen tauka undang-undang patut diubah.
Nya alai ku iya, ngubah undang-undang tauka konstitusyen begunaka timpuh panjai laban deka mutarka pekara tu ukai pekara ti mudah.
“Peminta bekaul enggau isu administrasyen udah diputarka dalam timpuh pandak.
“Aku deka madah ditu iya nya perintah Sarawak deka terus mai pulai baru hak kitai lalu pinta tu deka diteruska kitai taja pan begunaka timpuh,” ku iya.
Dulu ari nya, Sharifah Hasidah madahka Perintah Sarawak udah ngubah Pekara 1(2) Konstitusyen Perintah Besai, ti udah diteritka berengkah 11 Februari 2022.
Ubah tu mulaika status Sabah enggau Sarawak baka sebedau ubah Konstitusyen Perintah Besai digaga dalam taun 1976, ti diubah dalam taun 1976 nya udah nyadika negeri Sarawak nyadi sebuah negeri enggau negeri-ngeri bukai.
Taja pia, perintah negeri Sarawak deka mansik nama ke diguna kena ngubah nya belama, lalu sebarang ubah ti dirunding patut kena nentuka pekara ti dikemeratka negeri Sarawak dijaga.