Jerip: Opis Menteri Perengka Pengangkut udah nemu endur ke patut alai ngaga terminal bas di Pasar Kapit
Opis Menteri Perengka Pengangkut Sarawak enggau kerejasama sekeda ejensi perintah udah berandau sereta ngelala bagi taba ti setipak endur ngaga terminal bas di Pasar Kapit.
Sapit Menteri Perengka Pengangkut Sarawak Datuk Dr Jerip Susil madah, opis menteri iya mega udah bejalaika inisiatif berandau enggau pengemeran bas kena ngepunka servis bas ekspres mensia mayuh, ari Bagi Menua Sibu ke Bagi Menua Kapit pengudah tembu jalai alun ti nyambung kededua bagi menua tu.
Asil ari randau nya, servis bas ekspres mensia mayuh ari Sibu ke Kapit udah beoperasyen berengkah 1 Januari 2022.
“Nya alai, Opis Menteri Perengka Pengangkut Sarawak enggau kerejasama sekeda ejensi perintah ti bekaul kelebih agi Opis Residen enggau Pelilih Menua Bagi Menua Kapit, Majlis Pelilih Menua Kapit, Opis Kereja Raya Bagi Menua Kapit enggau Opis Tanah enggau Survei (JTS) Bagi Menua Kapit udah berandau sereta ngelala bagi taba ti setipak alai ngaga terminal bas di Pasar Kapit.
“Randau deka diatur baru entara Opis Kaunsil Pelilih Kapit, JTS Bagi Menua Kapit enggau Opis Pengawa Berumah (HDC) ti bechairmanka Residen Bagi Menua Kapit, sebedau peminta taba terminal bas tu ulih dikenataika ngagai Opis Perambu Negeri ambika diperunding sereta dikemendarka.
“Peminta ungkup belanja kena ngaga terminal bas di Pasar Kapit deka digaga ari baruh Pansik Setengan Penggal (KSP) Langgur Pemansang Malaysia Ke-12 Negeri lalu enggau pemisi perengkaguna terminal bas tu ila, dipelabaka servis bas ti efisyen disediaka ngagai peranak di Bagi Menua Kapit,” ku iya.
Dr Jerip madahka pekara tu lebuh ti nyaut tanya ari Wilson Nyabong Ijang (GPS - Pelagus) bekaul enggau status ngaga terminal bas ekspres mensia mayuh di Kapit maya sesi tanya saut ba Hari Ketiga Aum Kedua Penggal Keterubah Kunsil Negeri Sarawak Ke-19 ba
Kompleks DUN Sarawak ditu, kemari.
Dr Jerip bekaul enggau taba terminal bas nya madah, bisi tiga taba iya nya A, B enggau C.
“Taja pia bekaul enggau taba nya enda dikenataika enggau silik, lalu kitai beratika taba C lebih relevan.
“Kitai milih taba C laban ba kandang endur tu udah dikemendarka seunit begunan komersial nyengkaum alai ngaga terminal bas kelimpah ari bisi 40 unit rumah, 60 unit lot kedai sereta bisi pasar tamu enggau sebuah stesyen minyak,” ku iya.
Nitihku iya, servis bas ari Sibu ke Kapit ba terminal nya dipejalaika Lanang Road Bus Company enggau Kapit Bus Express.