Adat besai amat reti dalam pengidup raban bansa asal di Sarawak
BAKA sempama Melayu ti tebilang, “Biar Mati Anak Jangan Mati Adat” ti ngayanka sempama sosiobudaya Melayu ti kelalu balat ngemeratka pasal pemesai guna Adat, ti mandangka pemesai guna adat ngelui ari beratka nembiak mit.
Sehari tu sempama tu ukai semina dikena ba raban bansa Melayu tang jauh udah ngelui ari nya.
Menteri ba Opis Premier Sarawak, Datuk John Sikie Tayai madahka nya dilempaika ba Opis Kunsil Penyimpan enggau Penusun Adat Menua Sarawak (MAIS) enggau komuniti bansa asal bukai di Sarawak ti deka nyaga, ngintu, ngelaku enggau ngaku Adat bansa asal.
“Adat amat beguna ngagai anak negeri Sarawak, nya nyadi identiti, hak, pengelebih, budaya, pesaka enggau bisi pengasai ba diri empu,iya nya tanah tu - ‘Ibu Pertiwi Ku, Tanah Air Ku, Tanah Tumpah Darahku’.
“Taja pia, adat sama besai reti tauka guna dikena ngaduka kaul tauka pekara rama, ekonomi enggau politik, bejalaika pengawa, hak enggau pekara ti mesti ke tebal agi dalam komuniti bansa asal di Sarawak.
“Bisi mayuh kaul rama, ekonomi enggau politik, hak enggau pekara ke enda tau enda dalam komuniti bansa asal ke enda dijaga undang-undang menua,” ku iya seraya nampung jaku madahka sekeda pekara nya nyelai ba raban bansa Bumiputera sereta dijaga khas ngena adat.
Ambika chunto ku iya, ukai nyadi siti penyalah tauka penyalah sivil enda ngira sekalika ari baruh undangundang negeri tauka perintah besai dalam ruang bilik Iban ti ngemendarka lebih ari 30 hari ke udah manduk utai ba dapur tanah. Taja pia, tu siti penyalah dalam raban bansa Iban. Adat tu dikelala enggau ‘Chelap Dapur’ lalu udah digazet ari baruh Seksyen 21 Adat Iban 1993.
Nambahka nya, lebuh ti ngenang pekara tu maya nyimpul jurai Opis Premier Sarawak ba aum Kunsil Negeri apin lama udah iya madahka hak ba pengeraja asal, ngasu enggau ngumpul, ngubur enggau pemati sereta mayuh agi pekara bukai ti semina dijaga adat.
Nitihka sekeda jaku asal, leka jaku ‘Adat’ mayuh reti enggau tuju, ku iya.
Adat tau dikategorika ngagai dua, kategori keterubah: Adat ti nyadi atur undangundang enggau Adat ti nyadi atur rama.
Ba Native Judiciary tauka Native Legal System, Adat tauka atur undang-undang tauka undang-undang bansa asal enggau pengawa nya nyadi tanggungpengawa besai nyengkaum tanggungpengawa ti dipegai MAIS.
Batang pengawa kaunsil iya nya ngelalau Tuai Megai Menua enggau Kaunsil Aum Perintah Negeri pasal semua pekara ti bekaul enggau bansa asal negeri Sarawak.
Kelimpah ari nya, Kaunsil mega tau ngelalau enda ngira bagi sapa enti tauka lebuh enda ngira nama pekara bekaul enggau Adat dibai ngagai Kaunsil.
Pengawa beguna ke bukai ti dipejalaika Kaunsil iya nya nyaga, ngetan, ngelaku enggau ngaku Adat.
Ke diatu ku iya, Adat ti nyadi atur rama, luar ari tanggungpengawa Kaunsil.
Adat tu enda nanchang lalu ulih diteritka enda ngira ba kort undang-undang sereta enda nyengkaum dalam skop enggau bidang kuasa opis akim bumiputera tauka sistem undang-undang bumiputera.
“Taja pia, Adat tu endang agi chukup beguna kena ngangkatka rama, injinir rama (social engineering), enggau kaul sosio-budaya ari segi ulah ti manah dalam komuniti bansa asal,” ku iya.
Bejaku baru, iya madahka Adat iya nya atur undang-undang tauka undang-undang Bumiputera ke setipak enggau undang-undang.
Sesebengkah Adat ti nyadi undang-undang patut bejalaika undang-undang ke enda tau enda nanchang enggau ulih diteritka ba enda ngira orang bansa asal tu, bepanggai ba undang-undang raban bansa bumiputera empu ba endur sida diau.
Sebarang ulah ti ngelanggar enda ngira bagi adat nya, deka ngujungka orang ke salah nangkup tangkup pengawa penalti tauka ditunggu.
Nya ti midaka adat ke nyadi atur undang-undang enggau undang-undang ti setipak enggau atur rama, ku iya.
“Ambika chunto, Adat Iban ‘chelap dapur’ iya nya atur undang-undang enggau undang-undang ti betul.
“Adat tu netapka tetiap ruang bilik ba rumah panjai mesti ‘berapi tauka nungkunka api ba dapur tanah abis nadai sekali sebulan.
“Enti enda ulih nitihka nya, ngujungka orang ke salah tau kena ukum lalu diasuh nyendiaka barang nyadi ke genselan,” terang iya.
Adat ke nyadi atur rama enda setipak enggau undangundang baka nya ku iya, ambika chunto, nilai rama, etika, mereti ulah, bisi budi basa, enggau protokol kena meri sekeda nama, iya nya atur rama.
Sida nempa pekara ke enda tau enda bekaul enggau rama tauka moral, tang nadai ngembuan sebarang kuasa ti nanggam enggau undangundang, nya alai enda ulih diteritka enda ngira barang bagi kort undang-undang.
Enda ngira sapa ti ngelanggar tauka enda nitihka atur rama nya (mega disebut adat ba sekeda Jaku Tangkai Mengandai) enda ditinggang sebarang penalti tauka ukum.
Mega nyadi siti penyalah rama tauka moral, lalu orang ke ngelanggar nya tau dianggap nyadi siku orang ti enda beradat enggau nadai adat, ku iya.
“Ambika chunto, Adat sekeda raban bansa asal na“Ba gang nyebut nama apai indai entua ngena nama, lalu tu dikumbai atur rama. Atur tu nyaga anak nya ngena ulah enggau etika rama.
Adat kebendar iya (kededua atur undang-undang enggau rama) iya nya tau ditelah sosio-budaya undang-undang, atur, norma, nilai, enggau pengawa ti suah digaga ungkup sekeda peranak bansa Sarawak. Sida nyadi penyerakup rama ti nanchang raban tetiap komuniti begulai nyadi siti tim rama.
Adat mega bejalaika tangkup pengawa ti pemadu mujur dalam injinir rama enggau ngatur raban bansa asal. Enti nadai adat, raban bansa tau pambar tauka nadai penyerakup, ku iya.
“Nya alai, tangkup pengawa besai adat iya nya ngetanka pemaik, pengelantang enggau penyerakup tetiap komuniti, ti mungkur hak, pekara ke enda tau enda, enggau moral raban bansa asal.
pekara ke baka nya, adat tau dipadahka nyadi kereban kena nyaga rama, kontrak rama hak enggau pekara ke enda tau enda dalam komuniti bansa asal.
Kenyau ari jeman dulu menya, pengidup dalam raban rama, sida bebendar nempa raban bansa ti ideal lalu sida melabaka raban bansa deka idup dalam pemaik, pengelantang, penyerakup enggau pengidup ti sebela ari sukut rama enggau rohani enti semua orang nempa kaul rama enggau aktiviti rohani nitihka ‘ulah ti betul’.
Baka ditemu semua, tebal agi komuniti bansa asal madahka ‘ulah ti betul’ ulih nentuka kaul rama ti manah entara mensia.
Taja pia, sekeda raban bansa asal pechaya ‘ulah ti betul’ mega tau mai kaul rohani ti manah entara mensia enggau Tuhan. Komuniti tu pechaya ulah sesiku mensia tau mai empas ngagai rohani ti sebela.
“Nya alai, mensia patut ngereja ulah enggau aktiviti sida enggau bisi atur kena ngetanka rama enggau rohani ti sebela.
“Sebarang ulah ti enda manah dikereja raban bansa, sida tau diukum. Nya alai, ulah ti enda manah mesti disakal, tauka dikemetulka enggau lengkas nitihka adat kena nentuka pengelantang rama enggau rohani raban bansa ti tegap,” ku iya.
Taja pia ku iya, tebal agi ari adat kemaya hari tu dipeda baka enda setipak enggau ajar jalai pengarap sekeda raban bansa asal.
Patut dipeda sereta dipansik adat nengah perspektif undang-undang sekular tauka bandingka dulu. Engka bisi pemanah ba adat nya, ku iya.
“Ambika chunto, sekeda adat raban bansa asal ti ngukum pengempu rumah nyema temuai bisi telih tepuruk ba geladak ketegal teindikka papan repuk ba ruai pengempu rumah.
“Adat tu dipeda enda setipak agi enggau ajar jalai pengarap tauka pekara ke dipechaya sida laban kelimpah ari ukum mata duit, pengempu dipinta nyendiaka sekeda barang kena ke genselan dikena ngenyamaika ati.
“Enti dipeda ari perspektif undang-undang sekular tauka dibandingka, adat tu ngayanka tangkup pengawa pengempu rumah nyaga enda ngira sapa bagi temuai. Pengempu rumah enda tau enda bisi undang-undang kena nentuka pengelikun enda ngira sapa temuai di dalam rumah tauka nengah ruai.
“Bisi pemanah tauka rasional ba polisi adat tu ti sebaka enggau rasional polisi undang-undang Inggeris Occupiers’ Liability Act 1957 ti nentuka pengempu premis patut nyaga pengelikun temuai tauka orang ke datai nemuai ke rumah nya.
“Nya alai, selamat enti disimpul ke alai sekeda raban bansa asal bisi adat tauka undang-undang ti nyau deka sebaka enggau sekeda undang-undang Inggeris pengelama beabad ke udah,” ku iya.
Adat seruran nyadi kereban ke beguna kena nyaga kaul rama, ekonomi enggau politik sereta ngatur raban bansa asal seagi sida idup dalam gaya komunal ti homogen, lalu ejensi enggau opis berkuasa negeri enda enggau lengkas mantu ngatur nya.
Kaul rama, ekonomi enggau politik raban bansa ti kompleks agi patut dijaga adat, ti nyadi ‘cardial principle’ enggau ‘supreme law’ raban bansa.
Dalam pekara tu ku iya, adat nyadi sebagi ari chara bansa asal ngaduka diri empu, kelimpah nyadi sebagi ari chara bakani kitai bisi tangkup pengawa ngagai diri empu, ngagai pangan diri enggau ngagai raban bansa kitai Sarawak.
“Berindik ari meda pemesai reti Adat kena ngatur raban bansa asal, perintah Sarawak deka seruran nyukung enggau enda bebagi raban bansa asal ba sebarang pengawa nyaga, ngibun, ngelaku enggau ngerembaika adat nya.
“Perintah Sarawak enda kala ngelebu tauka seruran bejalaika tangkup pengawa ngagai raban bansa asal. Tu ukai reti pekara rama, ekonomi, tauka politik enda dijaga, ditan, dikelakuka tauka enda diaku adat.
“Semua pekara rama, ekonomi enggau politik raban bansa asal sama besai guna ba perintah Sarawak,” ku iya.
Pemesai guna tauka reti ngatur raban bansa asal ngena Sistem Undang-Undang Bumiputera, engka dichunto doktrin Iban ‘Bejalai Betungkat Ke Adat, Tinduk Bepanggal Ke Pengingat’.
Dalam jaku Inggeris ku iya, doktrin tu engka tau disalin nyadi “Aku deka nitihka undang-undang dalam semua utai dikereja aku, taja pan aku tinduk aku deka ingat”.
Reti nya ditu ku iya, enda ngira nama utai dikereja tauka utai ke ditinggal patut dikereja nitihka Adat, ti urung deka sama enggau prinsip “kedaulatan undangundang”.
Doktrin tu netapka tetiap iku orang mesti ngereja pengawa tauka ulah tauka utai ke ditinggal nitihka undangundang, tauka atur, tauka norma baka ti dikemeran lalu diterima raban bansa, ku iya.