Orang indu diperansang chakah ngaul diri dalam pengawa dagang

LIMBANG: Perintah seruran meransang orang indu ngambika ngaul diri dalam bidang pengawa dagang sekalika nengah chara ‘online’ dikena ngangkatka ekonomi ruang bilik.

Sapit Menteri Betanam Betupi Moden enggau Pemansang Kandang Menua Sarawak Datuk Dr Abdul Rahman Ismail madahka bala orang indu ulih ngena memanah pemisi perengkaguna teknologi ti disediaka dikena ngulihka penerang ti ulih mantu dalam dagang.

“Raban orang indu diperansang bejalaika pengawa dagang nengah chara online ke ulih rembus ngagai selampur dunya.

“Pandemik COVID-19 tu meri reti ti chukup besai lebuh mayuh orang indu ti ngaul diri enggau pengawa dagang sereta bealajar bedagang chara online,” ku iya lebuh ti bejadi Seminar Orang Indu Ruang Bilik Islam enggau tajuk Orang Indu Islam dalam Dagang ditu ensana.

Sama bisi iya nya Pemesai Pelilih Menua Limbang ti mega Chairman Komiti Mendam Pengerami Islam (JTPI) Limbang Superi Awang

Said, Chairman PERKIM Pampang Limbang Datin Dayang Maimunah Awang Mohd Daud enggau temuai dipebasa ke bukai.

Kaban Kunsil Nengeri (ADUN) Bukit Kota nya madahka penatai pemisi bala pedagang tu mega bela majak nambah taja maya COVID19 sereta bisi mayuh ti udah belajar ngena teknologi media rama.

Ku iya nambah agi, ngulihka penemu endang mesti dalam pengarap Islam kenyau ari mit nyentukka seput padam.

“Ngiga penemu iya nya siti ari proses ti meruan, nengah pengawa nulis sereta mayuh macham chara ngulihka penemu ti pemadu baru ke bukai diatu nengah aplikasyen Youtube enggau mayuh macham agi,” ku iya.

Beserimbai enggau nya JTPI enggau PERKIM ku iya mayuh udah nyukung dalam ngerembaika penemu nengah pengawa ngatur bemacham program jalai pengarap di pelilih menua tu kenyau ari taun nyin kemari.

Dulu ari nya, bisi 160 iku kaban berejista PERKIM Limbang nyereta seminar tu.