Kimpin Meri Darah beserimbai enggau ngintu Hari Pengajar Renggat Sibu nerima sambut ti manah

SIBU: Bisi 67 iku sida ti sama meri darah maya Kimpin Meri Darah beserimbai enggau pengerami Hari Pengajar Renggat Pelilih Menua Sibu 2022 kemari.

Kimpin ti diatur begulai entara Opis Pelajar Pelilih Menua (PPD) Sibu, Kelab Lions Antarabangsa Pelilih Menua 308-A2 Kandang Menua 2 & 3, Persatuan Bulan Sabit Merah Malaysia (PBSMM) Pampang Sibu enggau Unit Servis Transfusyen Darah Sepital Sibu.

Bisi 89 iku orang ti datai ngerejista sereta beperesa, tang semina 67 iku ti ulih meri darah, lalu 22 iku agi enda mujur laban ti bisi beempaka ubat, penanggul pengerai enggau ke bukai.

Pengawa ngatur kimpin tu nyadika nya sebagi ari pengawa mantu Bank Darah sepital ngulihka bekal darah ti chukup ungkup guna Sepital Sibu.

Kelimpah ari nya, raban pengatur mega udah muka kaunter meresa tikas gula dalam darah sereta meresa darah ti diatur Indu Opis PBSMM Pampang Sibu, Jalai Awang Ramli Amit ditu.