Beranakka puku dalam bidang pelajar ngena Duit Turu Pengaya Berdaulat
Premier Sarawak Datuk Patinggi Tan Sri Abang Johari Tun Openg optimis, ngaga perambu ke nyata beranakka puku ke pemaik pengidup bala anak jemah ila kelebih agi dalam bidang pelajar ngena Duit Turu Pengaya Berdaulat.
Ku Abang Johari, iya deka bejuraika rang undang-undang bekaul enggau Duit Turu Pengaya Berdaulat dalam Aum Kunsil Negeri (DUN) dalam bulan November tu ila.
“Enti wang kitai teguh,kitai ulih meri duit jali skolarship ngagai bala anak kita.
“Engka kitai meri ngagai nembiak ba pelajar tinggi enggau chara enda bebayar ngagai anak Sarawak. Nya niat ati aku tang gaya wang kitai mesti teguh.
“Kitai mesti ngenanka lebih asil kitai. Aku berani madahka pekara tu laban kitai deka bisi pemansut penatai pemisi ke manah agi,” ku iya madahka pasal juluk ati nya maya Pengerami Gawai Raya DUN Lambir 2022 enggau Bejadi Projek Pusat Komuniti Bersepadu (PICC) Taman Jelita Fasa Dua ditu, malam ensanus.
Sama bisi ngulu pengerami nya, bini iya Datuk Amar Juma’ani Tuanku Bujang, Menteri Dagang Temuai, Industri Kreatif enggau Seni Pemerindang ke mega Menteri Nembiak, Lumba enggau Main enggau Pemansang Orang Dagang Dato Sri Abdul Karim Rahman Hamzah, Menteri Perengka Pengangkut Sarawak Dato Sri Lee Kim Shin, Sapit Menteri Dagang Temuai, Industri Kreatif enggau Seni Pemerindang I (Dagang Temuai) Datuk Sebastian Ting, Sapit Menteri Pengerai Mensia Mayuh, Pengawa Berumah enggau Kaunsil Kandang Menua I (Pengerai Mensia Mayuh enggau Pengawa Berumah) Datu Dr Penguang Manggil enggau Sapit Menteri Nembiak, Lumba enggau Main enggau Main enggau Pemansang Orang II Dr Ripin Lamat ke mega ADUN Lambir.
Iya mega nyemetak madahka Sarawak patut landik ngena belanja laban beratika negeri tu diatu benung ba jalai ke betul sereta mansang enggau manah.
Kelimpah ari bulih penatai pemisi ari asil Chukai Dagang Negeri (SST) ba minyak enggau gis ti dipansutka di negeri tu, iya mega Sarawak melabaka deka bisi jalai pemansut baru nengah chara ekonomi baru, iya nya naruh karbon.
Nya alai, Abang Johari nyemetak madahka Sarawak patut bisi polisi kemerah lalu polisi nya patut diaduka enggau manah.
Berebak enggau nya, iya mega madahka diri berasai gaga ati laban Shell Malaysia udah mindahka baru operasyen indu opis ari Kuala Lumpur ke Miri.
Nya alai ku iya, Gabungan Parti Sarawak (GPS) deka ngerebut kerusi Parlimen Miri ari penyakal maya Pengawa Bepilih Besai (PRU) ke deka datai tu ila kena nentuka Miri maju ba jari perintah ke betul.
“Parlimen Miri mesti dipulaika ngagai GPS. Mengeri Besai Miri mesti nyadi mengeri minyak ti pemadu tebilang di Malaysia,” ku iya.
Bekaul engagu Pengerami Gawai Raya DUN Lambir 2022, Iya madahka pengerami nya mujur mandangka konsep tulin Keluarga Malaysia.
“Laban konsep Keluarga Malaysia udah dikemeran sereta nyadi sebagi ari pengidup pupu bansa di Sarawak.
“Nya alai, nadai isu begedika bansa enggau jalai pengarap di Sarawak, ketegal nya kami (GPS) ulih menang ba 76 kerusi ari82 kerusi maya Pengawa Bepilih Negeri (PRN) taun siti nyin tadi.
“Kebuah pia, laban kitai ngembuan batang juluk ke sebaka deka ngemansangka negeri kitai sereta nerabai hak kitai,” jelasnya.