Pemujur ngatur RWMF ditusun lalu digagaka nyadi bup
Pengawa numbuh, pejalai enggau penyulut 25 taun Festival Muzik Hutan Hujan Sedunia (RWMF) udah ditusun sereta digaga nyadi bup ti diberi nama Bup ‘The Rainforest Work Music Festival – A Journey of 25 Years’.
Bup ‘The Rainforest Work Music Festival – A Journey of 25 Years’ ti nusun pengawa numbuh/pemansang sekumbang 25 taun Festival Muzik Hutan Hujan Sedunia (RWMF), mujur dipenyadi Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah.
Abdul Karim madah, RWMF siti ari program kepenudi endar taun tu sereta ke pemadu beguna dalam kalender dagang temuai negeri.
Iya madahka RWMF tu mega ngarika Sarawak nengah muzik ngagai renggat dunya kelimpah ari festival tu udah nyadi chap Sarawak pengelama suku abad sereta udahka nudukka Sarawak ba kar dunya.
“Sehari tu kitai ditu bejadi cherita pasal festival tu. Dicheritaka dalam ‘glorious technicolour’, bup baru tu mai kitai ari pun Rainforest maya semina 300 iku aja orang ti rinduka muzik dunya datai begempuru ke Kampung Budaya Sarawak.
“Tu ke mai kitai betauntaun numbuhka nya ti ngujungka nyadi siti ari festival ti pemadu dikerindu enggau dirami didunya enggau udah nya, nuju transformasyen, keterubah, peneleba virtual ti keterubah di Malaysia ke alai pengujung iya ngalih ngagai peneleba hibrid ti nyelai ke deka dipenyadi taun tu, lalu tu siti agi keterubah di Malaysia.
“Bup tu nusui pasal ari sukut penemu mayuh personalitl ti bekaul tauka ngambi bagi ba festival tu ngelama tu. Pengerami tu, enda baka pengerami bukai, meri inspirasyen penaluk,” ku iya.
Abdul Karim mansutka pekara tu lebuh ke bejaku ba atur pengawa bejadi Bup ‘The Rainforest Work Music Festival – A Journey of 25 Years’ ke diatur ba Bilik Aum Mulu Opis Menteri Dagang Temuai, Industri Kreatif enggau Seni Pemerindang ba Begunan Baitulmakmur Sayap Baru ditu, kemari.
Nambah nya mega, iya madahka bup nya mega bisi nusui pasal orang ti chukup rindu ngulu tetiap kali RWMF diatur, raban pemuzik kemaya haritu kelimpah ari semua ke ngambi bagi, enda ngira bidang bisi ditusui dalam bup.
Kelimpah ari nya Abdul Karim ti mega Menteri Nembiak, Lumba enggau Main, enggau Pemansang Orang Dagang madah, nyerumba ngerami RWMF taun Ke-25, Randy Raine-Resch ke nyadi Direktor Artistik keterubah festival tu bisi dikangau sereta datai ari menua Kanada, ke mega siku ari ketuai Artistik kelimpah ari enggau bejadika bup.
“Randy mega siku ari tebangkar ti udah nyaup ba pekara ke dicheritaka dalam bup tu, enggau pemujur tauka penyulut festival tu,” ku iya nyebut entara pekara ke ditulis tauka dicherita dalam bup nya.
Bup ‘The Rainforest Work Music Festival – A Journey of 25 Years’ dikarang begulai Gracie Geike enggau Karen Shephered, ti bisi 170 lambir sereta bekulit tebal, bisi dijual nyerumba RWMF 2022.
RWMF datai baru sereta deka diatur ujung minggu tu iya nya berengkah ari 17 nyentuk 19 Jun 2022 di Kampung Budaya, kelimpah ari bisi diatur nengah chara hibrid.
Sama bisi datai ba pengerami tu kemari, Mendam Sekretari Opis Menteri Dagang Temuai, Industri Kreatif enggau Pemansang Orang Dagang Hii Chang Kee, Gracie, Karen enggau Randy.