Isu blok bilik kelas ba SMK Suai deka diputarka
Seraban pengereja pengawa khas deka ditumbuhka kena mutarka isu blok bilik kelas ba Sekula Sekondari (SMK) Suai ti lalu ena tembu digaga,lebih sedekad ke udah.
Dipadahka, projek ti gaga ngena geran khas perintah dulu ari nya udah tembu digaga dalam taun 2010, tang enda dikena sekula berengkah ari nya laban nadai kala diserahka ngagai sekula.
Sapit Menteri Pelajar II Datuk Mohamad Alamin madah, raban pengereja pengawa nya ila diguna ambika beratika baru sekalika begunan nya tau ditangkir tauka diangkatmanah.
“Tu ukai projek ke enda tembu digaga, nya tudah tembu digaga tang semina bisi penanggul sentang rikod enggau dokumentasyen.
“Anya alai, Opis Menteri Pelajar udah minta Opis Pelajar Negeri (JPN) numbuhka raban pengereja pengawa khas awak beratika baru pekara tu,” ku iya madah ngagai Utusan Borneo lebuh ke dirandau maya nemuai seraya kereja ke Niah, ensana.
“Kami dipadahka projek nya udah bisi dalam rikod JPN lalu kami udah minta sida ngaga dokumentasyen betul bekaul enggau projek nya, ambika dudi ila enti bisi pematut ngangkatmanah tauka nyeruri begunan nya, kami nadai napi penanggul.
“Tambah mega, begunan nya diatu enda tentu selamat tauka beresi lalu tu patut diputar ambika tau dikeda sekula nya,” ku iya.
Dulu ari nya, Mohamad Alamin udah ngabas beberapa buah sekula di Niah nyengkaum Sekula Primari (SK) Kita, SK Rancangan Sepupok, SMK Suai enggau SMK Subis meda projek ke benung digagan, ke tebal agi ari baruh Atur Pemansang Malaysia Lumpar Ke-12, nengah penerang ari kunteriktor enggau Opis Kereja Raya (JKR).
“Tuju penemuai seraya kereja tu mega kena nentuka semua projek pemansang ti dikemendarka ba sekula nya udah bisi kunteriktor kediri empu, ti dilalau nentuka kereja nya digaga enggau manah.
“Tebal agi projek nya, udah enggau benung digaga nitihka ti ditetapka.Bisi mega ke bedau tembu digaga nitihka ditetapka ketegal sekeda faktor baka Atur Nagang Pemindah PKP) maya pandemik suba, kunteriktor betapi enggau isu suntung pengereja pengaw suntuk perengka kena ngaga,” ku Mohamad Alamin.
Taja pia ku iya, opis menteri nya deka bejalaika sebarang atur ke patut kena nentuka projek ti lubah, ulih ditembu ba maya ti ditetapka.
“Kami dekaka asil nya alai aku beratka asil projek lalu udah minta JPN enggau Opis Pelajar Pelilih Menua (PPD) matau semua projek enggau silik,” ku iya.
Nyempulang iya lebuh ke nemuai seraya kereja nya, Direktor Opis Pelajar Negeri, Datu Dr Azhar Ahmad, Kaban Parlimen Sibuti, Lukanisman Awang Sauni enggau pengari ari JKR, JPN enggau PPD Subis.