Ubah hak ngempu tanah ngagai dua pengempu nama: Juanda

Sapit Menteri Integriti enggau Ombudsman Datuk Dr Juanda Jaya meri langgur penemu ambika perintah negeri ngubah hak ngempu tanah ngagai dua pengempu nama.

Ku iya, mar peranak asal Matu ti gawa ba menua luar ke udah meli rumah ambika ulih ngempu tanah kediri nengah Skim Pembesaran Kampung (SPK) ba endur asal mereka.

“Tebal agi orang asal Matu ti gawa di luar enda ulih ngempu tanah atas nama sida iya ba SPK laban udah meli rumah ba endur bukai,” ku iya lebuh ke bejaku ba Pengerami Nyuaka Surat PalaTanah Seksyen 18 KTN (Betanam Betupi) Kampung Tian, Matu enggau chek pampas tanah sereta exgratia sitak Kunsil Negeri (DUN) Jemoreng ba Dewan MayuhGuna genturung pendiau nya, ditu kemari.

Iya ke mega ADUN Jemoreng deka meda peranak asal Matu enggau ngempu tanah SPK taja pan udah meli rumah ba menua endur sida bekereja.

Iya nemu amat tanah nya aset ke beguna amat ba rayat.

“Ba rayat, tanah nya baka nyawa enggau imej sida, semua nya ba pengidup sida,” ku iya.

Dalam kandang lima taun, jalai alun enggau sambung jalai di Matu deka nyadi majak manah.

Nya alai, iya deka meda peranak asal Matu mulaika diri ngagai menua nya lalu ngaga rumah enti sida bulih SPK.

Berebak enggau nya, Juanda mega madahka kenyau ari iya nyadi pengari rayat sitak nya, iya kala meda sebuah rumah diuan lapan buah ruang bilik.

Ketegal nadai tanah udah ngujungka sida enda ulih ngaga rumah ke rumah ke chukup alai sida sebilik ti ngujungka sida bekunsi diau ba rumah nya.

Ku iya, udah datai ba maya iya perintah negeri berunding ngemayuhka skim baka SPK ba DUN Jemoreng.

Sama bisi bejaku maya nya, Sapit Premier Sarawak Datuk Amar Awang Tengah Ali Hasan.