Ngiling Bidai ba Rumah Catherine Tamoh richah pengudah dua taun enda diatur
Pengerami Ngiling Bidai ba Rumah Catherine Tamoh di Sungai Aup ditu kena Hari Enam nyin tadi richah pengudah dua taun enda diatur ketegal pandemik COVID-19.
Ku Tuai Rumah Catherine, pengerami Gawai sekali tu rami amat laban peranak rumah panjai nya ti gawa di luar Sibu bisi mulaika diri ke rumah panjai.
Ku iya baru, Ngiling Bidai siti ari adat raban bansa Iban kena ngelaika Gawai taun nya udah tembu diintu ti mega nyadi aktiviti ninting taun ke diatur Komiti Pengelikun enggau Pemansang Genturung Pendiau (JKKK) Rumah Catherine Tamoh.
“Aku gaga amat bati laban bisi kerejasama ari semua peranak rumah panjai ke enggau ngemujurka program Ngiling Bidai sekali tu,” ku iya.
Iya madah munyi nya maya program nya ti diatur ba panjang iya di Sungai Aup.
Ku iya baru, kerejasama entara peranak rumah rumah panjai nya mega nyadi pugu kena nentuka sesebengkah program tauka perambu pemansang rumah panjai nya mujur dipejalaika.
Catherine mega minta peranak rumah panjai nya ngemeratka pemansang ari sukut ekonomi engau pelajar anak Sungai Aup.
Kelimpah ngiling bidai, mauh agi aktiviti bukai udah diatur baka panggau pemerindang begulai enggau penyanyi Iban tebilang Rickie Andrewson enggau Angela Lata Jua.
Chabut tikit benasit enggau ngetas ranyai mega bisi diatur kena ngerichahka agi pengerami nya begulai enggau peranak rumah panjai nya.
Penutup pengerami iya nya ngiling bidai betuaika Catherine empu.