Sayur miding tau meri penatai pemisi ke besai: Awang Tengah
Sayur nya dijual enggau rega ke mar ba makit menua tasik
“Aku meda sayur miding dijual enggau rega ke mar di Singapura bedau ” lama udah. Datuk Amar Awang Tengah Ali Hasan Sapit Premier Sarawak
MUKAH: Sayur babas miding tau meri penatai pemisi ke besai ngagai orang ti ngemeranka pengawa nya.
Ku Sapit Premier Sarawak Datuk Amar Awang Tengah Ali Hasan, sayur nya dijual enggau rega ke mar ba makit menua tasik.
“Aku meda sayur miding dijual enggau rega ke mar di Singapura bedau lama udah,” ku iya lebuh ke bejaku ba Pengerami Nyuaka Surat Pala Tanah Seksyen 18 KTN (Betanam Betupi) Kampung Tian, Matu enggau chek pampas tanah enggau Exgratia ba sitak Kunsil Negeri (DUN) Jemoreng di Dewan Mayuhguna genturung pendiau nya ditu, kemari.
Ku iya, skim baka Skim Pembesaran Kampung (SPK), Kampung Tradisi enggau ke bukai ngembuan juluk kena meri jamin ngagai peranak dia ba tanah ke endur sida diau jemah ila.
Jamin nya diberi dalam surat pala tanah, awakka rayat tau ngemansangka tanah enggau ati ti lantang, ku iya.
Ba timpuh ke sama ku iya, kereja nyukat tanah dipelanja perintah magang lalu sida nadai dipinta mayar chukai.
Sekeda lot mega bisi disikap ngena mayuh macham perengkaguna baka jalai alun, parit, bekal ai enggau elekterik.
Iya mega madahka kereja nyukat tanah sekalika SPK, Seksyen 18 KTN, Kampung Tradisi enggau ke bukai deka dipejakka perintah negeri belama seagi bisi peminta.
Beserimbai engagu nya, bisi 191 iku peranak Kampung Tian nerima surat pala tanah Seksyen 18 Kanun Tanah Negeri (KTN) renggat kedua nengah inisiatif baru Hak Tanah Adat Bumiputera (NCR).
Nya mungkur 217 iti surat pala tanah ti disuaka Awang Tengah.
Ba pengerami nya mega, bisi enam iku penerima nerima pampas beungkus RM67,660 ari projek ngaga Jematan Igan.
Bisi 18 iku penerima nerima pampas RM2,589,316.99 ungkup projek Kampung Seberang Bawang, Matu.