Topik ti deka dipejuraika maya TGM PBB lebih progresif sereta beguna
Pekara ti dibantai sereta dipejuraika dalam Aum Besai Tiga Taun Sekali (TGM) Parti Pesaka Bumiputera Bersatu (PBB) ujung minggu tu deka ngayanka parti nya udah majak tinggi tauka nimpai jauh.
Mandal Presiden PBB Dato Sri Abdul Karim Rahman Hamzah madah, pekara ke deka dibantai sereta dipejuraika nya baka bekaul enggau hak Sarawak sereta Duit Turu Pengawa Berdaulat Sarawak enggau ke bukai, ti ngayanka pengawa jurai nya deka dipeda nyadi ‘angat’ sereta ‘idup agi’.
“Lebuh topik ke dipejurai datai ba tikas tu, aku meda kitai udah nimpai jauh ba penemu kitai. Enti suba pekara ti dibantai iya nya bakani kitai deka mantu orang dagang ba genturung pendiau bulih kunterik, tang diatu kitai nyebut pasal Duit Turu Pengaya Berdaulat Sarawak, bakani chara ngambi pulai hak kitai, bakani nyaga garis entara menua, bakani chara ngiga duit ari Spektrum.
“Jurai ti baka tu ba aku (ngayanka kitai) jurai ti lebih progresif enggau beguna,” ku iya ti mega Menteri Nembiak, Lumba enggau Main enggau Pemansang Orang Dagang Sarawak ditanya ba aum pengarang berita Aum Komiti Pemansang Nembiak Sarawak 2022 ba sebuah hotel ditu, kemari.
Bekaul enggau aum besai nya mega, Abdul Karim madahka pekara ti narit ati iya nya laban aum diatur pengudah baru tembu pengawa bepilih negeri lalu teulihka menang besai iya nya 76 ari 82 sitak kunsil negeri sereta bepelasarka populariti, menang urung 93 peratus ari undi.
Nya kebuah ku iya, ba TGM ke sekali tu nadai atur bepilih ungkup pangku pengawa ba renggat atas parti berindik ari renggat baruh udah ngasaika tim ke dipegai presiden ke diatu udah chukup manah lalu nadai kebuah tim tu ditegu.
“Taja pan maya pengawa enchalun dibuka, tang nadai deka belaban.
“Nadai siku deka nyatup presiden, sapit presiden, mandal presiden, laban kaban parti ngasai sereta meri peluang ngagai raban tu nyadi ketuai, laban sida ngayanka penau maya ba pengawa bepilih ke diatur sebedau tu.
“Taja pia ungkup sida Kaunsil Kereja Tertinggi (MKT) bisi dibuka ngagai sida ke deka belaban tauka ngelaban, ungkup Bumiputera bisi 22 dichalun tang ke dipilih bisi 16,” ku iya ti sempulang Sapit Menteri Nembiak, Lumba enggau Main enggau Pemansang Orang Dagang Sarawak Dato Gerald Rentap Jabu enggau Ripin Lamat.
TGM PBB deka diatur 17 nyentuk 19 Jun 2022 ba BCCK.
Aum besai parti tu disadang dipenyadi Premier Sarawak Datuk Patinggi Tan Sri Abang Johari Tun Openg, ke mega presiden PBB.