Raban ari KKMG nemuai meri basa ngagai Briged, PGA Sarawak
Raban ari Kolej Komuniti Mas Gading (KKMG) udah nemuai meri basa ngagai Indu Opis Briged Sarawak, Pasukan Gerakan Am pagi Hari kena Satu tu tadi.
Raban ari KKMG nya betuaika Direktor KKMG, Ts. Shirley Anak Phillip lalu udah disambut Komander Briged Sarawak, PGA, SAC Dr.Che Ghazali Che Awang, Chairman Persatuan Keluarga Polis (PERKEP) Briged Sarawak, Siti Nabihan Che Abdullah, enggau bala pemesai kanan polis.
Ku Shirley, tuju penemu nya enda ari kangau Komander kelimpah ngerembaika kerejasama kelebih agi bekaul enggau sekeda program kus pandak ti dipinta sereta bisi diajar ba KKMG pdudi ila.
Dulu ari nya, Shirley udah meri penerang bekaul enggau tanggungpengawa kolej komuniti sereta nerangka mimit pasal kus penuh enggau kus pandak ti bisi diajar ba kolej nya.
Iya mega berasai gaga amat ati laban ke dikangauka Briged Sarawak (PGA) dalam pengawa bekerejasa enggau KKMG, kena ngatur sekeda kus pandak ke mega nyadi strategi dikena ngenegapka modal mensia sereta nempa pengelandik ke ulih besemekih ba raban PGA enggau PERKEP.
Berkaul enggau isu nya, Ghazali udah meri langgur penemu, ke alai Briged deka nyikap diri nganjung raban sida enggau ba kus pandak ti diajar ba KKMG, laban sekeda kus ti disediaka nya amat ulih mantu dikena nambahka penemu, pengelandik sereta muka peluang dalam dagang ungkup ruang bilik sida tauka bala anak sida kelimpah ulih nyungkak sosioekonomi sida.
“Kus baka Kus Ngaduka Pemakai, Nanam Kulat enggau ke bukai nya amat mayuh peminta ba maya ke diatu, lalu sida ngarapka kolej sedia nyadi pemudah chara, sereta sedia nyendiaka kus ti lebih relevan nitihka gaya ke diatu nengah peminta ti manah ungkup raban apai indai, bala nembiak engagu mensia mayuh ba kandang menua nya.
“Ungkup Program Sepanjang Hayat (PSH) tauka sekeda kus pandak, PGA sedia bekerejasama enggau kolej lalu nyaup ngemujurka program ti diatur dudi ila, lalu kami nguji ngiga awak enggau peluang bekerejasama ambika pemaik ari kus tu mujur dijapai”, ku iya.
Ku iya baru, ba pengawa perintah ngeranchakka pemansang ekonomi menua, batang pekara ti patut dikemeratka iya nya mensia mayuh ba kandang menua nya mesti ngembuan penemu. Kolej Komuniti iya nya aset kerajaan ti nyadi platform kena ngerembaika penemu ngagai semua komuniti di menua nya, kena nambahka penemu sida dalam mayuh bengkah pampang penemu baka pengelandik sereta meri penatai pemisi enti sida udah pinchin ila.