Pengerami Gawai Dayak tau kena ngenegapka penyerakup pupu bansa
Hari Gawai di Sarawak ukai semina diintu raban bansa Dayak tang mega diintu begulai enggau raban bansa bukai baka sebuah ruang bilik ke besai.
Sapit Ketuai Parti Pesaka Bumiputera Bersatu (PBB) N.74 Pujut Masni Amit madah, mayuh bengkah pengerami ti diintu di Malaysia nyengkaum Gawai udah mujur nyerakupka pupu bansa.
“Pengerami Gawai Dayak udah tnyata dipeda ukai semina ulih ngelakuka budaya raban bansa Dayak ngagai raban bansa bukai, tau ngenegapka penyerakup entara bansa ke pengelantang semua,” ku iya.
Masni bejaku munyi nya ngarika Ketuai Pampang PBB N74 Pujut Lukanisman Awang Sauni maya Pengerami Ngintu Hari Gawai Dayak ti diatur PBB N74 Pujut, malam ensana.
Ku iya, penyerakup pupu bansa beguna amat kena nempa menua ti likun sereta harmoni.
“Kitai patut besukur laban menua kitai diuan pupu bansa lalu nadaika nyadi penyarut entara pupu bansa sekalika ari sukut jalai pengarap enggau budaya,” ku iya.
Kena ngenanka pengelantang tui, tetiap raban bansa patut besaup ngemansangka Sarawak ke penyenang semua.
“Nya alai kami ba N74 Pujut ngatur Hari Gawai Dayak kena ngerami kaban PBB kami ke bebansa Dayak lalu kena nerenak kerejasama enggau penyerakup,” ku iya madah nyemetak.
Tambah iya, enggau penyampau tubuh raban bansa Dayak ti mayuh, kerejasama enggau raban bansa bukai beguna amat ambika sama ulih ngasaika pemansang ari sukut politik, ekonomi enggau rama.
“Nengah kerejasama nyadi siti tim enggau ruang bilik dalam kuing politik ke sama, kami pechaya penyerakup enggau pemereti ati pupu bansa kaban PBB deka majak tegap,” ku iya.
Sama bisi ngulu pengerami nya, Sapit Ketuai Pampang PBB N74 Pujut Ngadan Melintang, Sekretari Pampang PBB N74 Abin Galleh, Tukang Wang Pampang PBB N74 Pujut Kamarudin Reduan enggau Ketuai Pemadah Pampang PBB N74 Pujut, Raji Karti.