Penimpang enggau pemar ke ditapi CBK ukai nyadi ke penanggul nyulut ba peresa SPM

KUCHING: Penimpang enggau pemar ke ditapi nyadi nembiak Berkeperluan Pendidikan Khas (CBK) ukai nyadi tegal tauka penanggul enda ulih tejapaika penyulut ba pelajar nyengkaum dalam peresa Sijil Pelajaran Malaysia (SPM).

Fairulnizam Abdul Rahman siku ari nembiak CBK ti bisi penanggul hiperaktif besekula ba SMK Tunku Abdul Rahman, Kuching ditu teulihka 6A 2B+ 1C+ ba pemutus peresa SPM 2021.

Iya ti asal ari Kuching lebuh dikerandau ba pengerami mantaika pemutus peresa SPM 2021 ke diatur ba Auditorium Opis Pelajar Negeri Sarawak ditu, enda nyangka diri bulih pemutus ke nyulut laban ngelama tu iya suah ngrunding tauka ngumbai pemutus peresa enda manah.

“Tang (diatu) meri puji ngagai Tuhan laban udah diberi pemutus ti nyulut tu sereta ulih ngemegahka ati apai indai aku.

“Pemar ke ditapi maya deka nyikap diri ngambi peresa SPM lebih agi maya menua betapi enggau pandemik COVID-19 (sereta belajar ari rumah), aku betapi enggau penanggul baka bungkur internet, penanggul gajet, masa sekula nangi ati laban mayuh bala bakih ti kena COVID-19 enggau ke bukai, tang semua pemar tauka penanggul nya enda nagang aku belajar ambika ulih nyapai pemutus peresa ti nyulut tu,” ku iya lebuh dirandau pengarang berita seraya madah diri nadai agi betanggaul enggau hiperaktif kenyau ari Primari Dua.

Baka nembiak bukai pengudah teulihka pemutus peresa, iya mega bisi ati deka nampung pelajar ngagai tikas ke tinggi agi kena nyapai juluk ati.

“Berindik ari juluk aku deka nyadi pengajar, udah tu aku deka nampung pelajar ba Institut Pematih Pengajar (IPG),” ku anak tunggal tu.

Ditanya chara belajar tauka tips teulihka penyulut, Fairulnizam madahka pekara dikemeranka iya tiap hari lebih agi maya bulan peresa iya dani tumu pukul 3 dini hari laban maya tu nyamai endur belajar sereta sunyi enti dibandingka belajar maya lemai enggau malam hari ke mayuh utai tau ngachau.

“Aku mega suah betanya ngagai pengajar enti aku bisi enda meretika nama utai ke dipinta ba tanya diberi (pengajar).

“Lalu pemadu dikeingkatka aku jaku pengajar aku iya nya enti kitai deka nyulut kitai mesti ngajar orang ngambika penemu nya lekat dalam untak kitai belama,” ku iya.

Nambah nya, Danny Yong Zhi Lik ti asal ari Sibu lalu belajar ba SMK Chung Hua teulihka pemutus 5A+ 2A 1Aba peresa SPM 2021.

Danny betapi ti bisi penanggul meda (mata) kenyau ari mit madahka kelimpah ari belajar ke diri bala bakih iya mega bisi mantu iya dalam pelajar ti ngujungka teulihka pemutus ti nyulut.

Iya ti teulihka A+ ba mata pelajar Sejarah ngembuan juluk deka nyadi pengajar Sejarah.

“Udah tu mega aku deka nampung pelajar, tang bedau temu dini.

“Juluk aku deka nyadi pengajar Sejarah. Aku rinduka mata pelajar sejarah sereta ba pemutus peresa SPM aku mega teulihka pemutus A+ mata pelajar tu,” ku anak biak ari tiga diri madi tu seraya madahka apai iya gawa nyadi mekanik sereta indai iya ngintu ruang bilik.

Kelimpah ari nya Shallzuandy Abdul Wahab Abdullah ke bisi datai ngagai pengerami mantaika pemutus peresa SPM 2021 lebuh dikerandau madah diri tekenyit meda pemutus 2A 4A- 1B+ 1D ke diterima iya laban sebedau tu maya ‘ujian percubaan’ enda kala bulih A.

Ditanya pemar ke ditapi, iya madahka pemar ke ditapi lebih agi bisi penanggul meda kenyau ari mit, maya belajar ari rumah lebih agi iya nya pedis deka belajar ngena telefon ketegal bungkur internet enda meruan, penanggul api dalam rumah, tang semua nya enda nagang ngulihka pemandai.

Anak tuai ari enam diri menyadi tu madahka penanggul balat rabun enda nanggul iya deka belajar tambah mega mayuh baka bakih enggau pengajar deka ngajar.

“Maya ba sekula, enti pengajar nulis ba papan tulis aku enda ulih meda nama utai ke ditulis. Aku minta bantu bakih aku ngasuhka iya macha lalu aku nyalin nama utai ke dibacha iya.

“Aku berasai beterima kasih laban bisi bakih ke ulih nulung aku taja aku bisi penanggul meda.

“Ba rumah aku belajar enggau bala kaban belayan sereta bakih ke semak. Sida seruran ngajar aku ba matapelajar aku ke lemi baka Bahasa Inggeris, chara bejaku ungkup mata pelajar Bahasa Melyau enggau Matematik,” ku iya ti besekula ba SMK Semop, Daro arap bendar diri ulih nyadi nembiak ke nyulut laban mayuh bakih enggau pengajar ti meri sukung enggau semengat.

Iya mega bisi ati deka nampung pelajar lalu nyapai juluk ti ditagit iya kenyai ari mit, iya nya nyadi pengajar Matematik.

“Enti bisi peluang aku deka nyambung pelajar ba IPG deka nyadi pengajar Matematik, laban endang ari mit aku rindu belajarka Matematik,” ku iya seraya madahka apai iya gawa kediri nyadi mekanik.

Nambah nya indai Shallzuandy, Julia Kiprawi, 37, lebuh dirandau madah diri gaga ati sereta endang nyangka anak iya bulih pemutus peresa ti nyulut.

“Kami endang selalu meri sukung ngagai iya, ngasuh iya belajar bebendar taja pan aku empu tusah deka ngajar iya laban diri empu nadai sekula.

“Baka juluk iya deka nyadi pengajar, kami endang nyukung iya,” ku iya.

Fairulnizam, Danny enggau Shallzuandy iya nya entara lima nembiak Berkeperluan Pendidikan Khas ke bulih pemutus ti pemadu nyulut ba pemutus peresa SPM 2021.