Penerang diri, ngapil pemutus peresa SPM 2021 tau digaga dalam timpuh 30 hari
Chalun peresa Sijil Pelajaran Malaysia (SPM) 2021 ke deka ngemetulka penerang diri tauka ngapil bekaul enggau pemutus peresa nya patut digaga dalam timpuh 30 hari pengudah pemutus dibantaika.
Direktor Opis Pelajar Negeri
Sarawak Datu Dr Azhar Ahmad madah pengudah timpuh ke udah ditetapka nya peminta ngemetul, ngapil tauka ngubah nya enda diterima.
“Bekaul enggau pengawa mantaika pemutus peresa tu (SMP 2021), chalun-chalun ti deka ngemetulka penerang peribadi dalam slip pemutus, meresa baru tauka ngemaruka pemutus sida patut diatur tauka digaga dalam timpuh 30 hari pengudah pemutus peresa dibantaika.
“Lembaga Peperiksaan enda nerima peminta enggau enda ngaga sebarang ubah bekaul enggau pemutus chalun enti diterima tauka dikenatai pengudah timpuh nya.
“Bayar meresa baru pemutus ke tiap mata pelajar iya nya RM100 sereta semua digaga tauka dipejalaika ngena chara online nengah aplikasyen e-Lembaga Peperikasaan (https://elp.moe.gov.my),” ku iya.
Azhar nerangka pekara tu nyerumba iya mantaika pemutus peresa SPM 2021 renggat negeri Sarawak ke diatur ba Auditorium Opis Pelajar Negeri Sarawak ditu. Iya disempulang chaiman pengatur pengerami tu, Jambai Sayong.
Berengkah ari pukul 10 pagi kemari (16 Jun 2022) nyentuk pukul 6 lemai kena 22 Jun 2022 semua chalun SPM 2021 ulih meresa pemutus peresa ngena SMS 15888 iya nya taip SPM
Chalun mega ulih meresa pemutus nengah myresultspm.moe.gov.my berengkah ari pukul 10 pagi kemari (16 Jun 2022) ngagai pukul 6 lemai 24 Jun 2022.
“Lalu ngagai chalun ti nadai bungkur internet, chalun ulih betanya ngagai sekula tauka Opis Pelajar Pelilih Menua serata Sarawak tauka Opis Pelajar Negeri Sarawak.
Sama bisi datai ngagai pengerami tu kemari, raban pengetua, raban chalun ke pemadu nyulut enggau apai indai chalun.