Mayuh projek udah dipejalaika, ke pemansang menua pesisir: Len
Kaban Kunsil Nengeri (ADUN) Kuala Rajang Datu Len Talif Salleh udah ngulu Pengerami Ngiling Tikai Gawai 2022, di dua buah rumah panjai di sitak Kunsil Nengeri (DUN) Kuala Rajang, bedau lama ti udah.
Dua pengerami nya udah diatur di Rumah Muli, Muara Payang ti udah ngempung peranak ari lima buah rumah panjai di sitak ti besemak sereta di Rumah Lidang Empati ti udah digulu peranak ari 13 buah rumah panjai di kandang menua Kerubong, ditu.
Lebuh ti bejaku ba pengerami nya, Len madah, mayuh projek rayat udah dipejalaika di kandang menua nya ti mekuh ngagai pemansang ari sukut rama, ekonomi enggau pengelantang pendiau peranak.
“Pengawa ti digaga tu iya nya dikena nangkup peminta komuniti di sitak tu dalam nentuka sida enda tinggal ari arus pemansang ke ulih ngangkatka tikas pengidup peranak.
“Juluk kitai diatu iya nya deka nentuka peranak ari DUN Kuala Rajang tu terus ngasaika pemansang ti meruan sereta enda tinggal ari pemansang ti dikemeratka perintah kelebih agi ti ngaul kandang menua pesisir.
“DIatu, pemansang ti dikemeratka kitai iya nya ti ngaul pemansang infrastruktur, ngenegapka perengkaguna sekula, ngangkatmanah perengkaguna elekterik enggau ai, sereta perengkaguna ke bukai ti endang diguna komuniti di kandang menua tu,” ku Len.
Iya madah munyi nya ba Pengerami Ngiling Tikai Gawai 2022 di Rumah Muli, Muara Payang enggau Rumah Lidang Empati, Kerubung, bedau lama ti udah.
Sama bisi datai enggau pengerami tu iya nya Kaban Parlimen Tanjung Manis Ir. Yusuf Abd Wahab.
Len ti mega SApit Menteri Pemansang Mengeri, Ngatur Pekara Tanah enggau Rampa Menua mega sama madahka, kenyau ari suba iya uudah ngembuan langkar pemansang ungkup sitak di DUN Kuala Rajang.
“Nyadi siku ari pengari rayat di kandang menua tu, aku enggau Kaban Perlimen Tanjong Manis Ir. Yusuf Abd
Wahab terus bebendar dalam nangkup peminta ari peranak rumah panjai ditu.
“Tang nama ti beguna agi iya nya kerejasama sereta sukung rayat dalam mantu Perintah GPS ngemansangka kandang menua pesisir tauka tebing tasik ngambika ulih dikena memanah bala rayat,” ku iya.
Dalam pengerami nya mega, Len bisi madah, kandang menua Muara Payang deka dikemansangka enggau infrastruktur pemun ti diguna seriris enggau sambung projek ngaga Jalai Pasi ke Tanjung Manis sereta pengawa ngaga Jematan Batang Rajang ti benung chakah dipejalaika.
“Taja tikas pejalai projek tu bisi lubah mimit, tang nya deka dipejalaika laban meretika pemas ke ditapi rayat ke begunaka infrastruktur dikena neruska pengidup ninting hari.
“Nya alai, aku ngarapka semua peranak rumah panjai seruran tegap enggau ulih bekerejasama enggau manah ngambika pemansang ulih dipejalaika enggau meruan,” ku Len nambah.