Perintah dipinta positif, proaktif mantu rayat ti tekeruga penatai pemisi ketegal COVID-19
KUCHING: Perintah dipinta sereta dikearapka bejalaika enggau chara positif sereta proaktif mantu rayat nyengkaum orang dagang raban indu ti balat tekeruga ba penatai pemisi enggau sosioekonomi ketegal pandemik COVID-19.
Ketuai Raban Orang Indu Parti Pesaka Bumiputera Bersatu (PBB) Dato Sri Fatimah Abdullah madahka, laban sepemanjai timpuh ke mayuh chara PKP dipejalaika kena betapi pandemik COVID-19, aktiviti ekonomi sereta menua balat tekeruga.
“Berindik enggau pekara tu, kena mantu sida ngambika angkat baru ari penanggul nya, Raban Orang Indu PBB minta tauka meri penemu ngagai Perintah ngambika bejalaika chara positif enggau proaktif baka; meri bantu ari segi modal ungkup sida ke begunaka bantu tu, ngatur kus literasi digital ungkup di kandang menua pesisir.
“Nambah nya ngangkatka literasi kewangan; ngenagapka penemu asas bejual ngena chara online; ngatur aktiviti motivasi pengawa dagang sereta nyendiaka perengka guna enggau meri pengelandik kena ngangkatka kualiti produk hiliran baka reka bentuk mungkus produk.
“Bantu ti baka tu amat beguna ti ngemuntangka orang dagang raban indu ngerembaika pengawa dagang sida. Nya alai dikearapka perintah ulih berundingka perambu kena ngerembaika bungkur bantu tu ngagai raban ti teberayan(tercicir), ti nadai lisin dagang,” ku iya ke mega nyadi Menteri Pemansang Orang Indu, Nembiak Mit enggau Pengelantang Pendiau Raban Bansa.
Fatimah mansutka pekara tu nyeruba jaku pengelalu iya ba pengerami bejadi Aum Besai Ke-15 Raban Orang Indu enggau Nembiak PBB , ti dipenyadi Sapit Presiden PBB ti mega Sapit Premier Sarawak Datuk Amar Douglas Uggah Embas, ti diatur ba BCCK ditu, kemari.
Lebuh ti ngenang pengawa bepilih besai ke-14 (PRU15), Fatimah madahka Raban Orang Indu PBB tetap komitment enggau bebendar deka nentuka chalun Gabungan parti Sarawak (GPS) menang ba semua 31 sitak parlimen.
Ku iya, kenyau ari pengawa bepilih negeri ke-12, Raban Orang Indu PBB ba semuan renggat terus ngemeratka pengawa ngemanahka pengelemi enggau ngenegapka pengering ke udah bisi.
“Enggau tu, Raban Orang Indu minta ngambika ungkup belanja disediaka sereta diberi terus ngagai Raban Orang Indu awakka ulih ngelanggur enggau bejalaika mayuh aktiviti servis rama enggau pengelantang pendiau raban bansa, mantu pengundi enggau meri pengarap ngagai sida awakka ngundi GPS ulih jampat diepajalaika.
“Nama ke udah dipejalaika nengah Program Menyantuni Rakyat nengah SKUAD SAYANG - reaching Out, Touching Hearts, Engage Minds, dipedah chukup meri impak manah enggau tanpa prasangka, mujur nunjukka imej GPS nyadi sebuah parti ti ukai semina ngembuan kecekapam ngiring Sarawak tang mega sebuah parti ti nadai bebagi sayauka rayat,” ku iya.
Kelimpah ari nya, Mantan Ketuai Raban Nembiak Dato Gerald Rentap Jabu dalam jaku pengelalu madahka dalam gempuru besai ke sekalitu, perlembagaan parti deka diubah sereta deka numbuhka Pertubuhan Belia PBB ungkup sida ke beumur 18 ngagai 28 taun.
Iya madahka nya asil ari penemu Presiden PBB ti deka ngenegapka raban biak ngambi bagi dalam politik enggau meri sukung ngagai pengereja pengaw ngagai menua jemah ila.
“Tang ingat tiap benih ke ditanam kitai nya patut diintu enggau penuh penyayau. Dibaja ngena penemu enggau dibesaika dalam jaga kitai semua. Nganti bebuah endang begunaka pengeliat, mayuh pemar enggau penanggul. Pia mega buah iya deka mansutka tunas enggau paung ti berega, Carbon Credit enggau ke bukai,” ku iya.
Dulu ari nya iya madahka enda kala dalam sejarah Raban Nembiak enggau Raban Orang Indu sebedau tu diaku, diberi mandat enggau pengerap ti chukup besai ari renggat atas.
“Ba renggat Raban Nembiak, bisi sembilan iku nyadi Yang Berbormat (YB) iya nya Fazzrudin Abdul Rahman, Miro Simoh, Aidel Lariwoo, Allan Siden Gramong, Datuk Hamzah Ibrahim, Azizul Annuar Adenan, Royston Valentine, Lukanisman Awang Sauni enggau aku empu
“Nambah dua iku nyadi Sekretari Politik Premier Sarawak iya nya Damen Rejek enggau Fazzrudin Abdul Rahman ke nyadi Ketuai Sekretari Politik, kelimpah ari bisi dua sapit menteri iya nya Aidel Lariwoo (ke nyadi Sapit Menteri Pemansang Infrastruktur enggau Palan Penyangkai Kapal (Pemansang Infrastrutur)) enggau aku empu (Sapit Menteri Pemansang Nembiak enggau Lumba enggau Main),” ku iya seraya madah bisi mega dalam Majlis Berkuasa Tempatan enggau ke bukai.