Sarawak deka ngemansutka mayuh asil kena ngangkatka tikas ekonomi
Berindik ari ubah Ordinan Kampung enggau Kanun Tanah ti meri autoriti ngagai nengeri tu nyentukka kandang langit
KUCHING: Atur pengawa ngubah Ordinan Kampung enggau Kanun Tanah ke dipejalaika apin lama deka muka jalai ngagai Sarawak ngemansutka mayuh asil kena nyapai ekonomi bepenatai pemisi tinggi.
“Nya potensi penatai pemisi ke ulih diasilka tauka dipungkal pengudah semua mekanisma ” dipejalaika. Datuk Amar Douglas Uggah Embas Sapit Premier Sarawak
Sapit Premier Sarawak Datuk Amar Douglas Uggah Embas madahka, ubah ngagai dua undang-undang nya udah ngemendarka kuasa tauka autoriti negeri ba kandang langit, ti nyengkaum kandang ti diguna ungkup spektrum enggau kandang baruh tanah kena nyiman karbon.
Iya madahka Premier Sarawak Datuk Patinggi Tan Sri Abang Johari Tun Openg chukup bebendar deka ngiga chara nambahka asil negeri tu.
“Nya potensi penatai pemisi ke ulih diasilka tauka dipungkal pengudah semua mekanisma dipejalaika.
“YAB Premier Sarawak enda ngetu ngiga chara bakani nambahka tauka nyungkakka penatai pemisi kitai laban ekonomi ti tegap, Sarawak mega tegap,” ku iya.
Uggah dikerandau raban pengarang berita pengudah bejadi Aum Besai Raban Orang Indu enggau Raban Nembiak Parti Pesaka Bumiputera Bersatu ke diatur ba BCCK ditu, kemari.
Uggah ke mega Menteri Wang enggau Ekonomi Baru II ditanya pengelama timpuh mekanisma nya diasilka, iya madahka pekara nya bedau ulih dikenang silik diatu.
Ku iya Premier Sarawak bisi chara ke ninjau ke diri empu bakani ulih ngulihka penatai pemisi baru kena nyapai ekonomi bepenatai pemisi tinggi lebuh manggai 2030.
“Rayat mesti enmu iya nya Gabungan Parti sarawak (GPS) ari baruh iring Premier Sarawak udah bejalaika mayuh projek nyengkaum 11 projek ti ulih nyambungka raban bansa menua pesisir,” ku iya.
Dulu ari nya lebuh bejaku ba pengerami tu, Uggah madahka perintah Sarawak udah bejalaika atur minta Cukai Jualan Produk (SST) ba produk petroleum, siti polisi ke udah ngenataika asil sepenyampau RM8.52 bilion, kenyau 1 Januari 2019.
Perintah negeri mega numbuhka Bank Pemansang Sarawak (DBOS) ti nyadi pekara ti dibayar alternatif negeri, ku iya.
“Naka ke sehari tu, DBOS udah ngemendarka RM9.7 bilion ngagai perintah Sarawak kena bejalaika pemansang infrastruktur,” ku iya.