Raban Nembiak, Orang Indu PBB patut nyikap diri betapi enggau PRU15
Raban Nembiak enggau Raban Orang Indu Parti Pesaka Bumiputera Bersatu (PBB) mesti nyikap diri tauka besedia napi pengawa bepilih besai ke-15 (PRU15), kena ngenukuka ulih menang ba semua 31 sitak parlimen.
Sapit Presiden PBB, Datuk Amar Douglas Uggah Embas madahka, kena nyapai pekara nya perintah Gabungan Parti Sarawak ti diiring tauka diketuaika YAB Premier Sarawak Datuk Patinggi Tan Sri Abang Johari Tun Openg mesti ngereja nama utai tauka projek ke udah disemaya mesti digaga.
“Nya alai Raban Orang Indu enggau Raban Nembiak, mesti belajar ari peneleba ke udah. Kedua, patut tauka mesti nerangka mayuh polisi pemansang sereta program perintah ke enda ditemu orang gentung pendiau.
“Ketiga, beri timbal penerang ngagai kami ke nyadi menteri pasal pejalai projek ke digaga ba endur kita. Enti projek enda digaga enggau manah, laun patut dipadah, anang nganti maya pengawa bepilih diatur baru deka madahka penanggul projek, patut diatu madah awakka kitai ulih ngemanahka projek nya.
“Kami begunaka kita (Raban Nembiak enggau Raban Orang Indu) nyadi pending enggau mata awakka kami ke nyadi menteri, tu misyen kitai, tu negeri kitai, tu program kitai. Enti projek nya manah sereta mujur kita empu ke untung, genturung pendiau sereta rumah panjai untung,” ku iya ti mega Sapit Premier Sarawak.
Uggah mansutka pekara nya lebuh iya bejadi Gempuru Besai Raban Nembiak enggau Orang Indu PBB Sarawak ke diatur ba BCCK ditu, kemari.
Nambah nya iya madahka PBB lebih agi Raban Nembiak enggau Orang Indu PBB patut nemu pemesai reti peranan media ke nyadi kereban ti bekuasa enggau pemadu beguna dalam dunya politik.
Ku iya, pemesai guna media ulih dipeda lebih agi maya PRU14 ti sebedau tu kebuh perintah besai Barisan Nasional tumbang laban Pakatan Harapan ke bisi raban media ti tegal dalam PRU14 2018 suba.
“Nya alai ba pekara tu, aku minta ngagai kita (Raban Nembiak enggau Raban Orang Indu) ngambika nyikap diri empu ngena penemu kemaya hari tu.
“Nyendiaka tim media ti kering, ngena teknologi ke bisi diatu kena ngetanka pekara ti amat. Malas serang berita bula enggau pemula ti udah dikerembaika kelimpah ari ngena inovasyen enggau teknologi media kena ngemetulka berita bula enggau numbangka berita bula,” ku iya.
Uggah berebak enggau tu madahka Raban Orang Indu ti diiring ketuai iya Dato Sri Fatimah Abdullah udah ngayanka komitmen ti nadai bebagi enda ngira maya lebih agi maya pengawa bepilih.
Penaluk enggau komitmen dalam Raban Orang ndu amat beguna ba PBB, lalu nya lai penyerakup enggau pengeliat ati patut diteruska kena ngemansang enggau narit pengerindu orang indu ngamb bagi dalam politik, ku iya.
Nambah nya Raban Nembiak mega ku iya nyadi raban ke dimua ti dikearap nyaga enggau ngetanka parti setipak enggau raban tu kenyau ari penumbuh parti PBB ti seruran negika semua pekara.
“Nya alai amat beguna Raban Orang Indu enggau Nembiak bekerejasama enggau ngenegapka iring enggau latih politik ungkup kaban kitai dalam parti kena ngangkatka pengarap diri senggau pengeransing dalam PBB.
“Lalu dalam kitai nyikap diri napi PRU15 ke deka datai, aku meri pengarap besai ngagai Raban Orang Indu enggau Raban Nembiak ngambika terus taluk ngagai parti, gawa enggau bebendar, komited enggau beintegriti.
“Nama utai ke dipeda aku iya nya sukung ti nadai begilik sereta kerejasama semua terus diberi ngagai chalun ti dipilih tauka dichiri ulih parti,” ku iya.
Sama bisi datai ba pengerami tu kemari, Sapit Presiden PBB Datuk Amar Awang Tengah Ali Hassan, Ketuai Raban Orang Indu Dato Sri Fatimah Abdullah, Mantan Ketuai Raban Nembiak Dato Gerald Rentap Jabu enggau sida ke bukai.