Pengerami Gawai Dayak patut mantaika pemanah main asal
Ukai nya enggau pemerindang bukai ti kelalu jauh limpang ti ulih ngasaka ati bansa Dayak
SIBU: Dua parti politik ditu ti ngatur pengerami Ngintu Hari Gawai Dayak enggau beperindang ba panggau ti enda ngena enggau pengerami nya udah ngujungka bisi sekeda raban ensiban ati kelebih agi ari komuniti Dayak ditu.
“Patut nya pengerami Gawai baka nya kitai pandangka enggau main asal bansa ti ” ngintu Gawai. Temenggung Stanley Gramong Bandar Ketuai Komuniti Iban
Temenggung Stanley Gramong Bandar madah, mantaika tanda nya enda engkeman enggau pengerami.
“Aku ngasaika chara raban pengatur program mandangka pemerindang ti nadai bekaul enggau budaya Gawai.
“Patut nya pengerami Gawai baka nya kitai pandangka enggau main asal bansa ti ngintu Gawai,” ku iya lebuh ti ditelefon pengerang berita, kilah ensanus.
Stanley madah, raban pengatur nyangka ulih ngayanka main asal Dayak ngagai orang ti datai baka ngajat tradisional.
“Dayak ti ngintu pengerami Gawai tu mayuh, bisi tiga bansa iya nya Iban, Orang Ulu enggau Bidayuh.
“Ngajat ketetiga bansa nya ulih dibantaika kitai ke alai nya engkeman agi enggau pengerami Gawai nyengkaum pengerami ngiling bidai,” ku iya nyemetak.
Nitih ku iya, tanda bukai kelimpah ari ngajat tradisional nyangka ulih dibantaika ba pengerami bukai ti nadai kaul enggau Gawai.
“Enda salah mantaika tanda bukai tang anang maya Gawai.
“Tanda tu ulih dibantaika lebuh pengerami bukai,” ku iya.
Stanley madah iya enda besetuju enggau chara pengatur program mantaika tanda bansa nya laban nya nadai kaul enggau Gawai.
Beserimbai enggau nya, Chairman Gempung Nasional Dayak Sarawak (SDNU)
Sibu Chambai Lindong madahka, Gawai patut diintu enggau chara ti betul sereta enda lari jauh ari pengerami ngintu baka selama, sekalika di rumah panjai tauka di kandang mengeri.
Nitih ku iya, tanda ti ngundang kontroversi ke dibantaika maya ngintu Gawai Dayak ditu, kena Hari Enam minggu nyin kemari udah jauh limpang ari chara baka selama ngintu Gawai ari komuniti Iban.
“Naka ke ditemu aku, aku bedau kala meda pemerindang bansa nya ke alai orang indu ngena gari ti enda senuyuh betanda ba atas panggau enggau tanda provokatif ba mua orang mayuh lebuh ti ngintu Gawai.
“Ngagai bansa Dayak enggau kelebih agi Iban, kami enda ulih ngintu Gawai enggau chara nya.
“Kami di SDNU Sibu ngasaika pemerindang baka nya enda bebasaka chara Dayak ngintu pengerami tu.
“Enda salah nyema bisi pemerindang belagu enggau betanda dikena nambahka chara mandangka main asal ngintu Gawai baka ngajat tang nya enda tau jauh limpang ari chara ngintu pengerami.
“Nyema tanda baka nya dibantaika dalam pub, pengerami melah pinag tauka makai selamat, nya nitihka pengatur program,” ku iya lebuh ti ditanya.
Bejaku enggau silik, Chambai madah, SDNU Sibu enda puas ati enggau pekara nya.
Iya madahka, berindika ari nya ti ngaul bansa bukai ngatur pengerami bansa nya, pengatur program patut nanya tauka minta padah ari tuai rumah, pemancha tauka temenggung.
“Nyema agi kakang ati, sida seruran ulih berandau enggau Majlis Adat Istiadat Sarawak (MAIS) ngambika tu enda limpang jauh ari pengerami Gawai ti diintu ngelama tu,” ku iya.
Taja pia, Chambai madah, program nya patut nyadika teladan ngagai sida ti ngembuan runding deka ngatur pengerami baka nya jemah ila.
“Anang ngaga kediri sebuah program ti bisi ngaul pemerindang dikena ngintu pengerami Gawai.
“Tanya ketuai komuniti kitai tauka sida ti landik enggau adat kitai.
“Pengatur program nyangka ngasaika sida enda ngaga sebarang penyalah, tang ngagai komuniti kitai, kitai enda ulih nerima nya.
“Nya alai sida mesti nemu enggau chara kitai ngintu Gawai lalu Gawai patut nya diintu enggau chara ti betul.
“Tu enda pedis, sida patut nemu laban sida suah agi ngabang ke rumah panjai lebuh ti pulai Gawai,” ku iya.
Tanda ti ngasuh bisi kontroversi tu iya nya pemerindang ti udah dibantaika maya Pengereami Ngintu Gawai Dayak diatur begulai Parti Demokratik Progresif (PDP) Bawang Assan enggau Parti Pesaka Bumiputera Bersatu (PBB) Zon Tengah di sebuah hotel ditu kena Hari Enam minggu nyin kemari.
Temuai ti dipebasa maya pengerami tu iya nya Presiden PDP Dato Sri Tiong King Sing sereta Sapit Menteri Pelajar, Inovasyen enggau Pemansang Pengelandik Dr Annuar Rapaee.