Pengawa nyeruri paip tiris di Batu 7 betapi enggau pemar, ku Lee
Menteri Perengka Pengangkut Dato Sri Lee Kim Shin madah, pengawa nyeruri paip tiris di Batu 7 Jalai Miri-Bintulu betapi enggau pemar.
Dalam status Lee di Facebook kena tengah malam Hari Empat, iya ngarapka pengawa nya ulih dipejalaika enggau manah sereta bekal ai deka bisi baru dalam timpuh 24 jam.
“Aku deka madahka iya nya pengawa nyeruri tu endang pedis enggau chukup mayuh penguji dalam gaya ti chukup tusah mega,” ku iya nerang.
Lee sama bekunsika pengawa nyeruri ti dibantaika terus tauka ‘live’ di aman media rama tebilang nya kena pukul 10 malam ti udah dipeda 14,000 penguna lalu udah bulih 360 orang ti bekunsika nya.
Iya ti mega Kaban Kunsil Nengeri (ADUN) Senadin madah, sida ti bejalaika pengawa nya udah ngaga enggau naka pemanah ti ulih mutarka penanggul tu.
Iya chukup bebasa enggau beterima kasih laban ti udah bebendar sereta komited bala pengereja pengawa ke udah betapi enggau pemar nya diatu.
Iya mega beterima kasih ngagai semua ejensi ti bekaul nyengkaum raban ari opis
Residen dalam ngagihka bekal ai ngagai kandang menua ti udah putus bekal ai.
Berengkah ari Hari Empat, enam palan dipilih raban LAKU dalam ngulihka bekal ai iya nya Loji Rawatan Air
Lambir, Miri Sentral (semak enggau palan bebelika barang SL), palan komersial Permyjaya (mua Permymall enggau Lot Kedai Komersial Siang Siang enda jauh ari palan bebelika barang Ah Hong), Desa Pujut Dua
Permyjaya (Lot Kedai Desa Murni sebedau McDonald), Senadin/Lutong (enda jauh ari restoran Jumbo, semak palan ngengkahka entukar New World Mart) sereta Piasau/Krokop (Taman Bulatan, perkarangan Stadium
Tertutup dan masjid Darul Ehsan Piasau.
Krisis ai di Miri tu nyadi baru kena tumu pagi Hari Empat pengudah sida LAKU Management Sdn Bhd ngeripotka bisi tiris ba paip besai baru pemesai 1100 mm diameter di Batu 7 enda jauh ari Puspakom kena 2:30 dinihari.
Kena 9 Jun nyin tadi, bekal ai paip ditu putus laban bisi tiris ba paip di kandang menua ke sama ti udah mujur diseruri.