Beribu temuai udah datai ngerichahka malam keterubah RWMF 2022
Panggau besai Kampung Budaya Sarawak (SCV) ba malam keterubah Rainforest World Music Festival (RWMF) 2022 kilah ensana dedat enggau penatai temuai ti ngemataka pemerindang konsert festival nya.
Gaya mua hari ti manah muakka malam sereta pemerindang konsert ti rami nyata udah ngemuaska ati bala orang ti datai ke pengerami tu.
Ke khas agi, konsert tu mega udah digulu Menteri Dagang Temuai, Seni enggau Mandangka Seni Sarawak Dato Sri Abdul Karim Rahman Hamzah urung pukul 8:10 malam.
Pemerindang dipunka enggau pengawa miring lalu ditangkanka enggau mayuh macham pemerindang ari artis antarabansa enggau menua tu empu.
Pengawa miring ti lalu ditangkanka enggau pemerindang ari Joy Ayala ari Filipina, Trad Attack (Estonia) enggau Phuong Bao (Vietnam).
Kelimpah ari nya, sama bisi ngaga konsert pemerindang iya nya urij Fedynskyj ari Ukraine, Blue Canyon Boys (USA), Abigail Washburn (USA), Kilema (Madagascar) sereta mayuh agi.
Pia mega artis tebilang menua tu bisi mantaika pemerindang ari sida iya nya Master Sape Mathew Ngau Jau, Jerry Kamit & Friends, Ezra Tekola, Alena Murang sereta nembiak indu mit beumur 11 tahun, Nikita Sarna.
Pemerindang konsert malam keterubah RWMF 2022 ditutup enggau pemerindang ari Sarawak iya nya ‘Chinese 24 Drum,’ ‘Yi Sing Opera Troupe’ enggau Madih.
Kelimpah pemerindang konsert muakka malam, RWMF 2022 mega dirichahka enggau mayuh macham aktiviti ti narit ati muakka pagi baka woksyop mini muzik, pengawa pemandang main asal sereta bejualka asil pengelandik jari enggau pemakai.