Potensial Sarawak udah diaku ba renggat dunya
Dunya ngaku potensial Sarawak dalam pekara bekaul enggau energi, pia ku Premier Sarawak Datuk Patinggai Tan Sri Abang Johari Tun Openg.
Iya madahka, orang ari menua luar baka Jerman, Korea, Belgium enggau ke bukai datai ke negeri tu ngenang pekara bekaul enggau energi.
“Korea deka nangkap karbon sida iya lalu deka disimpan di Sarawak. Aku nyaut..Ok, nama kebuah enda. Kitai deka mansik tu, tu deka nyadi penatai pemisi Sarawak.
“Nya alai lebuh kitai meda potensi Sarawak amat manah, aku meri perambu kitai numbuhka Dana Berdaulat (Sovereign Fund),” ku iya.
Abang Johari ti nyadi Presiden Parti Pesaka Bumiputera Bersatu (PBB) madahka pekara tu lebuh bejaku bejadika Aum Besai Parti PBB Sarawak Ke-15 ti diatur ba BCCK ditu kemari.
Bejaku baru iya madahka Sarawak deka nitihka menua Norway ti udah numbuh tauka ngemeranka Sovereign Fund.
“Menua Norway ti berengkah taun 1976, sehari tu dana sida USD 1.3 trilion, lalu taun nyin kemari, sida bulih USD 1.4 bilion. Sida ngambi peratus aja ke dikena perintah Norway, ke bukai disimpan sida.
“Norway sebuah menua ti pemadu kaya di dunya. Enti Norway ulih, enti kitai pandai, Sarawak pan ulih.
Lalu kitai ngiga dana kitai ari sumber ke bisi ba menua kitai, kitai tambah nilai sumber kitai nya sereta udah nya kitai ngemansangka serata Sarawak, enda ngira kita diau, nya niat kitai,” ku iya.
Kelimpah ari nya Abang Johari mega ngenang Sarawak udah nerima Bahasa Malaysia nyadi jaku rasmi sereta agi ngemeran tauka ngetanka Bahasa Inggiris nyadi siti agi jaku ke ulih diguna kena bejaku.
Dalam bup perlembagaan ku iya, bisi disebut ari baruh 161 enggau (3) iya nya reti kitai agi ulih ngena jaku Inggeris enggau kitai deka masuk digital ekonomi, sekular ekonomi enggau hidrogen sereta semua nya ngena istilah-istilah (leka jaku) dalam Jaku Inggeris ke tusah deka disalin.
“Ukai aku enda sealiran engau jaku kebangsaan, aku nitih ke nya, tang aku mega nitihka hak ke ditulis ba bup (perlembagaan) tu,” ku iya.