Jematan Sungai Klassen nyendiaka akses semin ungkup peranak di sitak nya
Pengawa ngaga jematan semin ti meraka Sungai Klassen ke baru di sitak Kunsil Nengeri (DUN) Simanggang diatu udah tembu.
Sapit Menteri Pelajar, Inovasyen enggau Pemansang Pengelandik Datuk Francis Harden Hollis madahka, projek Transformasyen Menua Pesisir (RTP) ti beungkus RM350,000 nya deka meri akses semin dikena meraka sungai nya.
“Perintah nengeri seruran ngamatka semaya dalam nyendiaka infrastruktur pemun dikena nangkup peminta komuniti.
“Nengah perengkaguna ti udah disediaka, nya ulih meri awak enggau peluang dalam ngangkatka tikas sosioekonomi peranak di menua nya,” ku iya dalam siti pengerami bedau lama ti udah.
Beserimbai enggau nya, iya udah ngulu Pengerami Ngiling Bidai Hari Gawai begulai enggau komuniti Dayak di Rumah Rangga Kampung Sungai Tenggak B, Undop, Sri Aman. Francis ti mega Kaban Kunsil Nengeri (ADUN) Simanggang meri besai terima kasih ngagai peranak di kandang menua nya laban ti udah ngatur program tu.
“Terima kasih ngagai peranak di rumah panjai laban agi ngemeranka tradisyen komuniti Dayak enggau ngatur pengerami bansa tu ti nyadika kelai pengujung musin pengerami nya,” ku iya.
Iya mega udah ngemendarka agih belanja geran projek mit menua pesisir (MRP) sepenyampau RM3,000 ngagai Komiti Pemansang enggau Pengelikun Genturung Pendiau (JKKK) Rh Rangga, Sungai Tenggak B.
Pia mega raban Biro Orang
Indu udah diberi agih belanja sepenyampau RM2,000 ti nyadika belanja dikena bejalaika aktiviti gerempung nya.
Sama bisi datai iya nya Sapit Residen Bagi Menua Sri Aman Elvis didit, Penghulu Mingging Sigan, Penghulu Andar Suntai, Penghulu Leonard Libau Anol enggau temuai dipebasa ke bukai.