Lebih 25,000 kaban Koop Sahabat deka nerima dividen ungkup taun 2021
Bisi 25,416 raban Koperasi Sahabat Amanah Ikhtiar Malaysia Berhad (Koop Sahabat) di Sarawak deka nerima dividen 10 peratus ungkup taun 2021.
Kaban Kaunsil Koperasi Kakitangan Amanah Ikhtiar Malaysia (AIM) Berhad ke mega Penulung Menijar Wilayah AIM Sarawak Abdul Hafiz Soni madah, nya berindik ari jaku ti dipansutka Chairman Koop Sahabat Mohd Najib Mohd Noor maya Aum Besai Pengari Ninting Taun Koop Sahabat Ke-9 bedau lama udah, ti madah dividen penguntung10 peratus lalu sama enggau RM5.8 juta ungkup 243,163 iku raban nya ungkup taun 2021 enti dibandingka enggau RM3.9 juta dalam taun 2020.
“Naka bulan Mac 2022 Koop Sahabat di Sarawak bisi 25,416 raban ti deka nerima dividen 10 peratus ungkup taun 2021,” ku iya madah nengah penerang berita kemari.
Ku iya, nya penyampau dividen pemadu tinggi kala dirikodka Koop Sahabat kenyau ari ditumbuhka dalam bulan Ogos taun 2012.
Berebak enggau nya, Abdul Hafiz madahka AIM Sarawak enggau AIM Pampang Serian bekerejasama enggau Koperasi Kakitangan Amanah Ikhtiar Malaysia Berhad nyengkaum Koop Sahabat tudah enggau aktiviti sereta pemandang beserimbai enggau Hari Koperasi Menua Renggat Negeri Sarawak ba Dewan Mensia Mayuh Serian kena Hari Minggu nyin tadi.
Program nya udah dipenyadika Sapit Premier Sarawak Datuk Amar Awang Tengah Ali Hasan.
Ba pengerami nya, Awang Tengah mega bisi ngelawa ruai AIM enggau Sahabat Ar Rahnu (Koop Sahabat) begulai enggau Kaban Parlimen Serian, Datuk Seri Richard Riot Jaem.
Program nya mega digulu Menijar Kanan Wilayah AIM Sarawak, Haryati Dahari.