Besukur laban ulih ngintu Hari Gawai Dayak baka maya sebedau bisi COVID-19

Komuniti Dayak di bagi menua tu patut besukur laban ulih ngintu Hari Gawai Dayak baka maya sebedau dunya kena laban pandemik COVID-19, pia ku Parlimen Bintulu Dato Seri Tiong King Sing.

Ku iya, dua taun ke udah pengeami Hari Gawai enggau pengerami ke bukai enda ulih diintu begulai enggau diri sebilik, laban dunya nyengkaum Malaysia kena laban virus pemunuh nya.

“Nya alai nengah penyikar perintah mutarka rampit COVID-19 tu, pengelekai nya ulih ditagang nyentuk ke sehari tu, tang agi begunaka tetiap iku individu nitihka prosedur operasyen standard (SOP) ti ditetapka,” ku iya.

Iya bejaku munyi nya maya Pengerami Makai Lemai Ngiling Bidai 2022 Balai Dagang Bumiputera Sarawak (DUBS) Pampang Bintulu ba sebuah hotel tebilang ditu, kena Hari Enam nyin tadi.

Ku iya, pegawa mutarka pandemik ti nyadi dua taun ke udah, endang berindik ari penyakah semua ngena SOP ti terit lalu mujur ngurangka penyampau berampit ninting hari.

Ku iya, Bintulu maya nya mega dilabelka naydi ‘Menua Bintulu’ berindik ari penetap tama ke terit dipejalaika ba bagi menua tu maya Atur Nagang Pemintah (PKP) dipejalaika.

“Pengawa ti dipejalaika kitai enggau ejensi ke bekaul maya nya endang kena nyeliahka pengelekai penyakit nya nyadi balat agi laban Bintulu sebuah menua ke nyadi fokus dalam sektor industri,” ku iya.

Ku iya, SOP ti terit dipejalaika nya udah meri empas positif laban COVID-19 ulih diputarka enggau jampat ti lalu nyengkaum pemati.