Penyampau maksimum skim duit jali rumah panjai deka dikerandauka: Dr Sim

Opis Menteri Pengawa Berumah enggau Kaunsil Kandang Menua deka betemu enggau komiti iya lalu berandauka pematut ngaduka penyampau maksimum skim duit jali rumah panjai.

Menteri opis nya ke mega Sapit Premier Sarawak Dato Sri Dr Sim Kui Hian madah, nya berindik ari rega perengka kena berumah ke udah niki rega.

“Diatu, skim nya deka meri duit jali maksimum RM50,000 ungkup tetiap ruang bilik.

“Nya alai ari RM50,000, kami deka betemu enggau komiti kami lalu berandauka pekara tu,” ku iya lebuh ke bejaku bejadi Program Penyedar Penyakit Rabies enggau Renga Babi Afrika (ASF) enggau Pengerami Ngiling Bidai ba Rumah Bunsie Tiboh, Jalai Salim-Belalang ditu, bedau lama udah.

Dulu ari nya, Dr Sim madahka perintah negeri ngungkupka RM50 juta setaun ungkup skim nya kenyau ari taun 2020.

Ku iya, ngena agih belanja RM100 juta nya, penyampau rumah panjai ti bulih penguntung ari skim nya dua taun ke udah, mayuh nambah.

“Penyampau nya sama enggau lima taun penyampau rumah panjai ti bulih penguntung ari skim tu sebedau perintah negeri ngemendarka penyampau nya.

“Penyampau nya deka majak nambah,” ku iya seraya madahka duit jali ke diberi nya nadai bungai.

Ku iya, skim nya keterubah enar dibantaika ex-Menteri Besai Dato Sri Najib Tun Razak ngena agih belanja RM20 juta.

Udah nya, penyampau nya dikurangka ngagai RM10 juta setaun lebuh perintah

Pakatan Harapan (PH) megai perintah, lalu agih belanja nya mega ditangguhka, ku iya.

“Perintah besai meri baru agih belanja RM10 juta nya lebuh kuasa bekalih baru ba prenggat perintah besai.

“Udah nya aku nanya ngagai Menteri Besai kitai sentang pekara tu.

“RM10 juta setaun enda umbas lalu rintai nama ke nganti (orang ke deka nginjau) nya panjai sereta lubah amat diproses.

“Nya kebuah dua taun ke udah, perintah negeri ngepunka meri RM50 juta ungkup skim tu,” ku iya.

Sama bisi ngulu pengerami nya, Sapit Menteri Pengerai Mensia Mayuh, Pengawa Berumah engau Kaunsil Kandang Menua II Michael Tiang, Kaban Kunsil Negeri Bukit Assek Joseph Chieng, Chairman Opis Kaunsil Pelilih Menua Pesisir Sibu (MDLBS) Sempurai Petrus Ngelai enggau sapit iya Wong Ching Yong.

NUTUP GAWAI: Dr Sim (dua kanan) enggau (ari kiba) Wong, Tiang, Sempurai enggau Chieng ngemujurka Pengerami Ngiling Bidai di Rumah Bunsie di Sibu, bedau lama udah.

NUTUP GAWAI: Tiong (tiga kiba) negmujurka pengawa Ngiling Bidai ke mega simbolik nutup Gawai Dayak ti diatur DUBS Pampang Bintulu, Hari Enam nyin tadi.