Individu ke deka mujur dalam pengawa dagang mesti berani napi pemar
Individu ke deka mujur ba pengawa dagang mesti ngembuan ulah ti berani sereta sedia napi sebarang pemar ke deka datai.
Kaban Kunsil Negeri Krian, Friday Belik madahka pemar enggau penguji dalam bidang tu besai amat tang bisi jalai deka mujur jemah ila.
“Skop dalam bidang tu besai amat, nya tau meri penatai pemisi ke besai enti dipejalaika enggau bebendar sereta sistematik.
“Pemansang dunya teknologi diatu mai bidang tu majak maju ke mua sereta ngembuan mayuh peluang dalam sektor globalisasyen.
“Nya alai, perintah amat ngalaluka mensia mayuh masuk bidang tu kelebih agi ba pengawa ngasilka produk pemakai laban nya endang seruran bisi peminta ke amat tinggi sereta mayuh,” ku iya lebuh ke bejaku ba Pengerami Bejadi ‘Program Keusahawanan dan Pensijilan Latihan Pengendali Makanan’ (LPM) Pelilih Mit Menua Roban, ensanus.
Program tu diatur ba Dewan Mensia Mayuh Roban ti diatur Opis Menteri Dagang Antarabansa enggau Industri, Terminal Industri enggau Pemansang Orang Dagang Sarawak (MINTRED).
Friday ngarapka pesereta ngena semua peluang ti disediaka perintah ke nyadi jalai ngaul diri dalam bidang tu.
“Diatu perintah nengah sekeda ejensi ti dichiri bisi nyendiaka mayuh macham bansa bantu ngagai raban orang ke bisi pengerindu deka ngaul diri dalam bidang tu.
“Nya nyengkaum bantu baka geran, duit jali mudah, opis enggau ke bukai. Bantu tu ditumbuh kena ngemudahka pesereta ngaul diri dalam pengawa dagang.
“Ungkup ke bisi ati deka ngaul diri dalam bidang dagang bepelasarka pemakai, sida mesti ngemeratka pekara pemeresi kelimpah ari asai barang pemakai ti dijual nya nyamai, laban nya tau nyadi ‘selling point’ dagang sida,” ku iya.
Ba pengerami nya,Friday mega bisi nyuaka setipikit ngagai pesereta ke ngulu kus nya.
Sama bisi ngulu pengerami nya SAO Roban, Michael Meling enggau bala ketuai raban bansa dalam kandang menua Roban.