Penguang temegah ati enggau sukung ari rayat di DUN Marudi
Sapit Menteri Pengerai Mensia Mayuh, Pengawa Berumah enggau Kaunsil Kandang Menua Datu Dr Penguang Manggil mantaika pengaga ati ngagai rayat di sitak N.76 Marudi ti udah meri sukung ti rat ngagai iya.
Ku iya madah, sukung tu ukai semina dikena nentuka bulih menang besai maya Pengawa Bepilih Nengeri nyin tadi, tang mega ulih meri sepenggal agi dikena neruska pemansang di Marudi.
Iya madahka pengaga ati diri lebuh ti pengerami ngintu Hari Gawai 2022 diatur komiti pengatur DUN N.76 Marudi di Rumah Justine Manai, Sungai Entulang, Block C ditu, bedau lama ti udah.
Urung 2,500 iku orang ti datai lalu sama bisi enggau pengerami tu iya nya Kaban Parlimen Baram Anyi Ngau, Sekretari Politik Premier Sarawak Alexander Aseng Sadai, Chairman Opis Kaunsil Pelilih Menua Marudi (MDM) Kunsilor Edward Mendai, Pemesai Pelilih Menua Beluru Alfred Geling, Pemesai Pelilih Menua Marudi Nurlila Ulis sereta bala pemancha, penghulu enggau tuai rumah di sitak N.76 Marudi.