Champion ‘Selangau Rafting Challenge’ deka mai pulai mata duit RM5,000
Perais mata duit ti besai sepenyampau RM5,000 enggau trofi deka diempu champion ‘Selangau Rafting Challenge’ ti diatur beserimbai enggau Pesta Selangau 2022.
Chairman pengatur, Kunsilor Henry Kanyan Vincent Rawing madah, ba penuduk lumur dua deka mai pulai perais mata duit RM4,000 enggau trofi lalu lumur tiga bulih RM2,500 enggau trofi.
“Sida ti ba penuduk lumur empat enggau lima bela deka mai pulai perais mata duit RM500.
“Pia mega, pemenang ti bulih gelar ‘Most Attractive Raft’ deka nerima mata duit RM500 enggau trofi,” ku iya lebuh ti ditanya media nengah aplikasyen ‘WhatsApp’, kemari.
Henry Kanyan ti mega kaban Opis Kaunsil Kandang Menua Pesisir Sibu (SRDC) madah, pengawa ngelepaska pesereta Selangau Rafting Challenge deka diatur di Rumah (Rh) Banyan, SUngai Wong, Ulu Mukah kena 30 Julai ti deka datai.
“Bayar enggau nyereta pekit tu iya nya RM500 lalu hari bulan kepenudi nganyung penyereta iya nya 18 Julai. Ke penerang ti silik, tau betelefon ngagai Kunsilor Christoper Kusa Buan (011-31826584), Felisca Ashira Uga (011-11766397) enggau Sherman Laja (0138415068),” ku iya.
Pesta Selangau Edisyen Keempat deka diatur pengelama tiga hari berengkah ari 27 nyentukka 30 Julai ti deka datai.
Kelimpah ari pekit tu, bisi mega pekit bukai ti deka diatur kena ngerichahka agi pengerami iya nya pekit pemajik, karaoke, ‘fun run’, ‘dart’, sereta futsal.
Ku Henry Kanyan madah, Pesta Selangau Edisyen Keempat tu deka nyendiaka mayuh ti bebida ari sukut penyampau perais.
“Kitai udah nambah penyampau perais laban kitai deka ngangau mayuh agi pesereta ari Kuching, Sibu, Bintulu enggau Miri, ke lalu ulih ngangkatka tikas pengawa ngatur program ari tiga edisyen ti udah,” ku iya nerang.
Nitih ku iya, Pesta Selangau udah dipasukka dalam Kalinda Program Nengeri Sarawak, enggau pengawa ngatur nya ditetapka 27 nyentuk 30 Julai ninting taun.