Perintah patut ngambi pengereja pengawa menua luar, ngelengkaska projek ‘sakit’ tembu
Projek pemansang ti lama enda tembu di Sarawak kenyau ari dua tauka tiga taun ti udah begunaka perintah meri pemerat dalam pengawa ngambi pengereja pengawa ari menua luar dikena nentuka projek tu tembu enggau lengkas.
Sapit Menteri di Opis Premier (Pekara Korporat enggau Komunikasyen Perintah Sarawak) Datuk Abdullah Saidol madah, mayuh projek ke bedau tembu lalu tu udah ngasuh mayuh komuniti irau ati kelebih agi di kandang menua pesisir.
“Bisi nya tejanggal pengudah dua taun pandemik COVID-19, ti udah ngujungka kunteriktor betapi enggau penanggul nadai duit masuk lalu pia mega penanggul kurang pengereja pengawa dalam neruska projek.
“Nyema enda diputarka lengkas, tu deka ngasuh komuniti di menua pesisir asa ati,” kuk iya pengudah bejadika ‘Jerayawara Ulang Tahun Ke-10’ Tabung Ekonomi Gagasan Anak Sarawak (TEGAS) di Balai Komuniti Bintangor, kemari.
Iya ti mega Kaban Kunsil Nengeri (ADUN) Semop nya madahka, raban sida deka terus ngangkatka kaul koomuniti kelebih agi ari Gerempung Apai Indai enggau Pengajar (PIBG) sereta bala pengajar dalam pengawa nerenakka runding nyadi orang dagang digital tauka technopreneur ba renggat sekula.
“Ekonomi digital iya nya siti utai ti enda ulih diseliahka, tu iya nya sebagi ari pengidup sekalika dalam pengawa ngatur dagang tauka administrasyen jemah ila,” ku ya nerang.
Nitih ku iya, enda ngelui 3,000 iku orang dagang digital udah ditempa nengah aktiviti TEGAS di Sarawak kenyau ari tu ditumbuhka 10 taun ti udah.
“Tang pengujung nya dalam struktur ti besai digital ekonomi, ke pemadu beguna iya nya kitai nentuka infrastruktur telekomunikasyen kitai ba tikas ti pemadu manah kelebih agi di menua pesisir,” ku iya.
Abdullah ti mega Sekretari Lembaga Amanah TEGAS madah, enda lebih ari 7,000 menara telekomunikasyen udah enggau deka digaga di selampur Sarawak.
“Pengawa ngaga tu endang betapi enggau mayuh penguji laban pemesai Sarawak sereta palan pendiau peranak ti enda betusun kelebih agi di kandang menua pesisir. Nya mih ti nyadi penguji kitai, kitai tetap nguji nentuka datai ba dua nyentukka tiga taun agi penetrasyen komunikasyen kitai dalam tikas ti pemadu manah,” ku iya.
Sama bisi datai iya nya Pemancha Yii Hee Siang, pengari Residen Pelilih Menua Sarikei Safidi Tumboh, pengari Pemesai Opis Pelilih Menua Meradong Mastia Jaini sereta pengari Pemesai Opis Pelejar Pelilih Menua Meradong Ursula Bayai.