Palan penyangkai kapal Bintulu entara ti pemadu beguna di Sarawak
Pemerat Palan Penyangkai Kapal Bintulu ti nyadi entara palan penyangkai ke beguna di Wilayah Sarawak entara isu ti dikerandau Opis Menteri Perengka Pengangkut Malaysia (MOT) enggau Kaunsil Palan Penyangkai Kapal Bintulu sereta Bintulu Port Holdings Berhad.
Sapit Menteri MOT Datuk Henry Sum Agong madah, perintah nengah opis menteri iya endang mekuh ngagai pemerat semua palan penyangkai kapal di menua tu nyengkaum palan penyangkai kapal di Bintulu.
“Palan penyangkai kapal Bintulu terus nyadi sebuah ari palan penyangkai kapal ti beguna di Wilayah Sarawak sereta mega nyadi pintu penama eksport besai minyak sawit enggau gas asli cecair (LNG) ngagai Malaysia,” ku iya lebuh ti nerima penemuai meri basa ari Kaunsil Palan Penyangkai Kapal Bintulu enggau Bintulu Port Holdings Berhad kemari.
Kaban Parlimen Lawas nya madah agi, mayuh macham pekara dikerandau begulai dalam nentuka Palan Penyangkai Kapal Bintulu meruan enggau pemerat nya.
Deligasyen ti datai enggau pengawa tu iya nya Ketuai Pemesai Eksekutif (CEO) Kumpulan Bintulu Port Holdings Berhad Dato Mohammad Medan Abdullah, Menijer Besai Kaunsil Palan Penyangkai Kapal Bintulu Mizool Amir Mat Drus, Sapit Sekretari Pekara Wang Nengeri Sarawak ti mega Ahli Lembaga Pengarah Bintulu Port Holdings Berhad Hasmawati Sapawi enggau bala pemesai kanan Kaunsil Palan Penyangkai Kapal Bintulu enggau Bintulu Port Holdings Berhad.