Jalai berengkah ari Kpg Bakam ke Simpang Sepupok deka diangkatmanah
Jalai tebing pantai ti berengkah ari Kampung Bakam nyentukka Simpang Sepupok Niah deka diangkatmanah dikena nentuka pengelantang enggau pengelikun penguna jalai alun.
Dalam aum ti udah disereta Sapit Menteri Infrastruktur enggau Pemansang Palan Penyangkai Kapal Aidel Lariwoo lemai kemari madahka jalai pesisir tu iya nya entara jalai besai ti nyambung Bintulu enggau Miri.
Tu iya nya jalai perengka pengangkut darat ungkup industri ti nyambungka mengeri Miri enggau Bintulu sereta mega jalai besai peranak ke pasar Miri.
Pengawa ngemesaika jalai ti ngaul pengawa nambahka 1.5 meter besai tisi jalai ungkup kededua piak enggau pemanjai jalai bisi 20 kilometer.
Projek ngemesai tisi jalai tu iya nya entara ti endang dianti peranak Bakam berindik ari jalai sebedau tu kelalu mit sereta udah dipadahka nyadi palan ti suah endur nyadi penusah bebadi jalai alun.
Nitih ku aum nya mega, pengaa ngemesaika jalai ari 1.5 meter nyentukka minimun 2.5 meter ungkup kededua piak tu iya nya bepelasarka standard R3 Opis
Kereja Raya (JKR).
Perambu projek ngemesaika jalai tu iya nya ngaul agih belanja urung RM150.2 juta.
Nyema tembu, projek ngemesaika jalai tu dipelabaka deka nentuka pengelantang enggau pengelikun penguna jalai alun.
Kelimpah ari nya, penyampau kes bebadi jalai alun mega dipelabaka deka kurang bererenggat.
Sama datai enggau aum tu iya nya Sapit Menteri Pemansang Orang Indu, Nembiak Mit enggau Pengelantang
Komuniti ti mega Kaban Kunsil Nengeri (ADUN) Bekenu Datuk Rosey Yunus, Sapit Menteri Nembiak, Lumba enggau Main enggau Pemansang Orang Dagang, Ripin Lamat sereta Kaban Parlimen Sibuti Lukanisman Awang Sauni.