Peminta nyemilik parti patut diperundingka dulu enggau renggat baruh: Dr Rundi

Pekara bekaul enggau sekalika nerima tauka enda peminta kaban ari parti bukai ke dalam Gabungan Parti Sarawak patut diperundingka dulu enggau renggat baruh.

Mandal Presiden Kanan Parti Pesaka Bumiputera Bersatu (PBB) Dato Sri Dr. Stephen Rundi Utom madah laban sukung rayat ngagai GPS enda patut dikeruga.

“Tu demokrasi. Nadai sapa ulih nagang sapa. Tang nyadi parti, nyadi presiden kanan parti, kami deka ngaga pemutus maya renggat atas parti ngaga pemutus. Tang kami deka berunding mega enggau renggat baruh.

“GPS ngayanka bisi sukung ti manah ulih rayat Sarawak, nya enda tau dikeruga. Kitai mesti terus tegap tauka kering, kitai mesti taluk ngagai semaya ti ditegika ungkup Sarawak.

“Barang sapa deka negika Sarawak, sida nya deka nyadi bakih aku tauka bakih kitai,” ku iya lebuh ditanya bekaul enggau Kaban Parlimen Lubok Antu Jugah Muyang enggau Kaban Parlimen Puncak Borneo

Datuk Willie Mongin dipadah minta masuk tauka nyemilik GPS.

Dr. Rundi ti mega Menteri Betanam Betupi Moden enggau Pemansang Kandang Menua madah munyi tu lebuh ti bejaku nyerumba bejadi program Agroinvest 2022 ditu, kemari.

Bejaku baru Dr. Rundi madahka, sebedau ngaga sebarang pemutus patut dikerunding enggau rayat laban kitai udah nemu mimit gaya tauka sejarah politik sida dikena nyeliahka ari pekara sama nyadi baru jemah ila.

Nengah penemu iya, patut entap ba siti parti lalu ukai mudah beginsit tauka begilik.

“Aku udah dalam parti (PBB) betaun-taun, tu penggal ke lima aku, aku nadai ngasaika aku mindah kekini, enti aku ngetu aku ngetu ditu.

“Ulah ti baka tu ke dikedeka kitai enti sida deka nyadi bakih dalam GPS,” ku iya.

Ba sebengkah ripot berita portal madahka, Kaban Parlimen Lubok Antu, Jugah Muyang nadai ati deka masuk Parti Bangsa Malaysia (PBM), sereta bepelasarka Jugah maya dikerandau sebengkah portal berita madah diri udah minta deka masuk Parti Rakyat Sarawak (GPS) ari baruh GPS tiga bulan ke udah.

Ba PRU14, Jugah bediri minta pilih ngena tiket chalun Bebas, menang sitak parlimen nya enggau 1,059 undi majoriti.

Iya masuk PKR ba bulan Mei 2018, sebedau ngelengkaka parti nya ba bulan Jun 2020 lalu nyadi Kaban Parlimen Bebas nyentuk diatu.

Kelimpah ari nya Datuk Willie Mongin Kaban Parlimen Puncak Borneo mega diripotka udah ngenataika peminta masuk GPS.

Bepelasarka ripot berita, Willie madahka, iya ngenataika peminta nyadi parti komponen GPS nya beberapa bulan ke udah, tang bedau nerima sebarang pemutus sekalika diterima tauka enda.

Nitih ku Willie, iya enda kala masuk Parti Pribumi Bersatu Malaysia (Bersatu), tang semina kena ‘parking’ dalam parti nya dikena nyukung perintah ke udah ditumbuhka.